2025-ci il martın 18-də Qusar rayonunda  Xəzər Universiteti və Qusar rayonu Cibir kənd məktəbinin birgə təşkilatçılığı ilə Novruz bayramı keçirildi. Tədbirdə Xəzər Universiteti Mədəni Antropologiya və Folklor İnstitutunun koordinatoru Dos. Aynur Qəzənfərqızı və Cibir kənd məktəbinin Azərbaycan dili və ədəbiyyat müəllimi, Xəzər Universitetinin məzunu Nəcibə Zeynalova çıxış edərək,  iştirakçıları Novruz bayramı münasibətilə təbrik etdilər, belə ənənəvi bayramların birliyi və mədəni dəyərləri yaşatmaq baxımından önəmli, şagird və tələbələrin bu bayramı birgə qeyd etməsinin sevindirici olduğunu vurğuladılar.

 Xəzər Universitetinin İctimai əlaqələr və media üzrə direktoru  Əlövsət Əmirbəyli  Novruz bayramının Azərbaycan mədəniyyətində xüsusi yer  tutduğunu, bu bayramın insanları bir araya gətirən və dostluğu gücləndirən mühüm bir dəyər olduğunu qeyd etdi.

Tədbirdə Qusar Təhsil Sektorunun əməkdaşı İldırım Zeynalov, Özbəkistandan gəlmiş qonaq  Dilbər Haydarova, Xəzər Universiteti Humanitar və sosial elmlər fakültəsinin dekan əvəzi Aygün Verdiyeva, universitetin müəllimi Elmira Kekeç də çıxış ediblər. 

Novruz şənliyində Cibir kənd məktəbinin şagirdləri bayrama həsr olunmuş səhnəciklər, milli rəqslər nümayiş etdirdilər. Xəzər Universitetinin müəllimi aşıq Ramin Qarayev öz ifaları ilə, Xəzər Universitetinin rəqs qrupu da öz çıxışı ilə tədbirə əlavə gözəllik bəxş etdilər.

Tədbirin sonunda  Aynur Qəzənfərqızı bayram şənliyinin təşkilində fəal iştirak edən Cibir kənd məktəbinin şagirdlərinə təşəkkürnamələr təqdim edərək, təşkilatçılara və iştirakçılara minnətdarlıq bildirdi.

Ələsgərli Nigar

Xəzər Universiteti,

Azərbaycan dili və ədəbiyyatı müəllimliyi ixtisası, 1-ci kurs