2025-ci il fevralın 28-də  Xəzər Universitetinin Həyat elmləri departamentinin təşkilatçılığı ilə "1 Mart Ümumdünya Mülki Müdafiə Günü"nə həsr olunmuş tədbir keçirilib. Tədbirdə universitetin professor-müəllim heyəti və tələbələri iştirak ediblər.

Tədbiri Həyat elmləri departamentinin müəllimi Aslan Rzayev açaraq, mülki müdafiənin əhəmiyyəti və əhalinin fövqəladə hallara hazırlığı barədə danışıb. Humanitar, təhsil və sosial elmlər fakültəsinin tələbəsi Məhəmməd Ağazadə Beynəlxalq Mülki Müdafiə Təşkilatının tarixi və Azərbaycanın bu qurumdakı rolu barədə ətraflı məlumat verib.

Departamentin müəllimi Gülafət Şəfiyeva "Fövqəladə hallar zamanı təhlükələr, qorxu və insan psixologiyası" mövzusunda çıxış edərək, mühüm məqamlara toxunub.

Tədbirin praktiki hissəsində ilk yardım və xilasetmə tədbirləri nümayiş etdirilib. Həyat elmləri departamentinin müəllimi Şahanə İbrahimova süni tənəffüs və ürəyin qapalı masajının qaydalarını, Humanitar, təhsil və sosial elmlər fakültəsinin tələbəsi Aydan Nəsirli isə dəm qazından zəhərlənmə zamanı ilk yardım üsullarını izah edib.

Sonda Həyat elmləri departamentinin müəllimi Mais Talışxanov və Xəzər Universitetinin Media və ictimaiyyətlə əlaqələr üzrə direktoru Əlövsət Əmirbəyli insanların təhlükəsizliyinin təmin edilməsinin, həmçinin təbii və texnogen xarakterli fövqəladə hallarda əhalinin mühafizəsinin vacibliyini vurğulayıblar. Tədbir tələbələrin suallarının cavablandırılması ilə yekunlaşıb.