2025-ci il fevralın 28-də Xəzər Universitetinin Elmi Şurasının növbəti iclası keçirildi. İclası universitetin rektoru vəzifəsini icra edən Prof. Məhəmməd Nuriyev açaraq, gündəlik məsələləri Elmi Şura üzvlərinin nəzərinə çatdırdı.

İlk olaraq, M. Nuriyev Elmi Şuranın tərkibində edilən dəyişikliklər barədə məlumat verdi. Sonra gündəliyin birinci məsələsi – doktorant və dissertantların dissertasiya mövzuları və elmi rəhbərləri barədə Təbiət elmləri, sənət və texnologiya fakültəsinin dekanı Günel Bahəddinova məruzə etdi. Hər bir tələbə tədqiqat aparacağı dissertasiya mövzusunun aktuallığı, istifadə olunacaq metodlar və digər mühüm məqamlar haqqında danışdı. Şura üzvləri tələbələrə suallar ünvanladı və mövzular səsvermə yolu ilə təsdiq edildi.

M. Nuriyev gündəliyin ikinci məsələsi – imtahan sessiyalarının nəticələri haqqında Elmi Şura üzvlərini məlumatlandırdı.  Qeyd etdi ki, 2024/25-ci tədris ilinin payız semestri üzrə imtahan sessiyası 6-28 yanvar tarixləri arasında təşkil edilmişdir. Sessiyada bakalavr səviyyəsi üzrə 3.948, magistratura səviyyəsi üzrə isə 493 olmaqla, ümumilikdə 4.441 tələbə iştirak etmişdir. O, fakültələrin təşkil etdiyi final, cərimə və tamamlama imtahanları ilə bağlı geniş məlumat Verdi, fakültələrin keyfiyyət və müvəffəqiyyət göstəricilərini şura üzvlərinin diqqətinə çatdırdı.

M. Nuriyev gündəliyin üçüncü məsələsi – 2024/25-ci tədris ilinin payız və yaz semestrləri üzrə departamentlərin dərs yükü barədə danışdı. O, hər bir departamentin mövcud fənn və qrup sayı haqqında məlumat verərək, müdirləri olmayan departamentlərə təcili şəkildə rəhbər təyin olunmasının vacibliyini vurğuladı.

Elmi şuranın gündəliyindəki bütün məsələlər müzakirə olunaraq, müvafiq qərarlar qəbul  edildi.