Xəzər Universitetində Dillər və ədəbiyyatlar departamentinin təşkilatçılığı ilə 2025-ci il fevralın 20-də “21 fevral - Beynəlxalq ana dili günü” çərçivəsində “Dil və cəmiyyət: Müasir yanaşmalar” mövzusunda elmi-praktik seminar keçirilib.

Seminarın məqsədi dil və cəmiyyətin qarşılıqlı əlaqəsini dəyişən cəmiyyətin prinsipləri çərçivəsində müasir yanaşmalarla izah etmək olub.

Xəzər Universitetinin Dillər və ədəbiyyatlar departamentinin müdiri dosent Dilbər Zeynalova seminarı açıq elan etdikdən sonra tədbir əsas məruzəçilərin çıxışları ilə davam edib.

ADPU-nun Elmi-təşkilati şöbəsinin müdiri, Əməkdar müəllim, filologiya elmləri doktoru, professor İbrahim Bayramov “Müasir Azərbaycan ədəbi dilinin lüğət tərkibinin zənginləşməsi yolları” mövzusunda, Beynəlxalq Pedaqoji Akademiyanın həqiqi üzvü, Pedaqoji və Sosial Elmlər Akademiyasının akademiki, Azərbaycan Jurnalistlər Birliyinin üzvü, “Qızıl qələm” mükafatı laureatı, Əməkdar elm xadimi, pedaqoji elmlər doktoru, professor Fərrux Rüstəmov “XIX əsrin sonu - XX əsrin əvvəllərində Azərbaycan maarifçilərinin dil uğrunda mübarizəsi” mövzusunda, YUNESKO-nun Seçki qrupunun eksperti, YUNESKO-nun Qlobal Gənclər Birliyinin üzvü, AMEA-nın Nəsimi adına Dilçilik İnstitutunun Nitq mədəniyyəti və monitorinq şöbəsinin müdiri, filologiya üzrə fəlsəfə doktoru, dosent Vəfa Abdullayeva - Nəbiyeva “Dil normativlərinin qorunması, sosial təşviqat” mövzusunda və Xəzər Universiteti Dillər və ədəbiyyatlar departamentinin müəllimi, filologiya üzrə fəlsəfə doktoru İlkin Əsgərov “Azərbaycan dilinin tədrisi və təbliği dövlət siyasətinin prioritet istiqaməti kimi” mövzusunda məruzə ediblər, seminar iştirakçılarının suallarını cavablandırıblar.

Sonra tədbirin əsas məqsədini – dilin cəmiyyətə və cəmiyyətdəki dəyişikliklərin dilə təsirini əks etdirən videoçarx izlənilib. Süni zəka ilə səsləndirilən materialda ana dilimizə müasir yanaşma xətti, Azərbaycan dilinin texnologiyanın dili olma potensialının cari durumu müşahidə edilib.

Qeyd edək ki, tədbir Xəzər Universitetinin tələbələri ilə yanaşı, “Dünya” məktəbinin 10-cu sinif şagirdlərinin də fəal iştirakı ilə keçib.

Seminar tələbələrin Xəzər Universitetinin “Hər gün, hər saat mükəmməlliyə doğru!” şüarını fərqli dillərdə səsləndirmələri ilə başa çatıb.