2025-ci il fevralın 14-də Xəzər Universitetinin Mərmər salonunda universitetin Mədəni Antropologiya və Folklor İnstitutunun və Mirvarid Dilbazi Poeziya Məclisi İctimai Birliyinin birgə təşkilatçılığı ilə “Kitablar ən yaxşı dostumdur” mövzusunda tədbir keçirildi.Tədbirdə universitetin rəhbərliyi, əməkdaşları, tələbələr və şəhid ailələri iştirak edirdilər.

Əvvəlcə şəhidlərin xatirəsi yad edildi, sonra mövzuya aid qısa videoçarx nümayiş olundu. Universitetin qurucusu, Direktorlar və Qəyyumlar Şurasının sədri Prof.Akad. Hamlet İsaxanlı  çıxışında tələbələrə kitabın, mütaliənin mahiyyətini və əhəmiyyətini izah etdi və kitab oxumaları üçün onlarla təşviqedici söhbət apardı.

Mirvarid Dilbazi Poeziya Məclisi İctimai Birliyinin rəhbəri Güllü Tomarova kitab oxumağın – mütaliənin zehni inkişaf üçün mühüm vasitə olması haqqında fikir və mülahizələrini bildirdi. Çıxışından sonra tələbələrə müxtəlif kitablar hədiyyə etdi.

Riyaziyyatçı mütəxəssis Turan İbrahimov çıxışından sonra çox sevdiyi tanınmış yazıçı Əzizə Cəfərzadənin kitablarını tələbələrə hədiyyə verdi.

Şəhid ailələri adından çıxış edən Sevil Hüseynova oğlu - şəhid Zaur haqqında danışdı və onun xatirəsinə yazılmış bir kitabı Hamlet İsaxanlıya təqdim etdi. Sonra Aynur Qəzənfərqızı tədbiri daha maraqlı edərək,  tələbələrlə bir sorğu keçirdi. Doğru cavab verənlərə Hamlet İsaxanlının müəllifi olduğu kitablar hədiyyə olundu..

Nigar Ələsgərli

Xəzər Universiteti, Azərbaycan dili və ədəbiyyat müəllimliyi ixtisası, 1-ci kurs