2025-ci il fevralın 4-də Xəzər Universitetində fəaliyyət göstərən tədqiqat mərkəzlərinin, akademik departamentlərin və fərdi alimlərin elmi araşdırma fəaliyyəti haqqında illik hesabat görüşü keçirildi. Görüş çərçivəsində universitetdə aparılan elmi tədqiqatların nəticələri, əldə edilən nailiyyətlər, qarşıya çıxan çətinliklər və onların həlli yolları, həmçinin beynəlxalq və yerli əməkdaşlıqların təsiri, elmi nəşrlərin və layihələrin perspektivləri, eləcə də gələcək tədqiqat istiqamətləri müzakirə olundu.

Görüşü Xəzər Universitetinin təsisçisi, Direktorlar və Qəyymlar Şurasının sədri Prof.Akad. Hamlet İsaxanlı açdı. O, universitetin son illərdə elmi fəaliyyət sahəsində əldə etdiyi uğurlardan bəhs edərək, tədqiqatların universitetin beynəlxalq nüfuzuna təsirindən danışdı.  Eyni zamanda, elmi tədqiqatların keyfiyyətinin artırılması, multidissiplinar araşdırmaların təşviq olunması və universitetin elmi nəşrlərinin beynəlxalq səviyyədə daha geniş tanıdılması istiqamətində atılmalı olan addımları vurğuladı. Həmçinin, tədqiqat mərkəzlərinin fəaliyyətinin dəyərlindirilməsi üçün yaradılmış komissiya və onların üzərinə qoyulan öhdəliklərlə bağlı fikirlərini səsləndirdi.

Qeyd edək ki, komissiya bu tərkibdə yaradılmışdı: Təbiət elmləri və mühəndislik fakültəsinin dekanı Fəxərəndə Əfəndiyeva, Təbiət elmləri, sənət və texnologiya yüksək təhsil fakültəsinin dekanı Günel Bahəddinova, İqtisadiyyat və menecment fakültəsinin dekanı Raziyə İsayeva, İqtisadiyyat və biznes yüksək təhsil fakültəsinin dekanı İnqilab Əhmədov, Fizika və elektronika departamentinin müdiri Fəridə Tatardar, Keyfiyyətin Təminatı Mərkəzinin direktoru Lyudmila Sotova.

Komissiya adından geniş hesabatı Təbiət elmləri və mühəndislik fakültəsinin dekanı Fəxrəndə Əfəndiyeva təqdim etdi. O, bu mərkəzlərin qarşıya qoyduğu əsas məqsədlər, əldə olunan nəticələr və qarşıdakı dövrdə nəzərdə tutulan strateji planlar haqqında ətraflı məlumat verdi. Hesabatın sonunda komissiyanın irəli sürdüyü tövsiyələr dinlənildi və onların reallaşdırılması üçün müvafiq addımlar müzakirə edildi.

Keyfiyyətin Təminatı Mərkəzinin direktoru Lyudmila Sotova 2024-cü il üzrə departamentlərin və fərdi tədqiqatçıların elmi fəaliyyət nəticələrini əks etdirən hesabatı təqdim etdi. O, universitetin elmi məhsuldarlığının artırılması, tədqiqatların keyfiyyətinin yüksəldilməsi və məqalələrin beynəlxalq reytinqli jurnallarda dərc olunması istiqamətində görülən işlər barədə ətraflı məlumat verdi.

Tədbirin yekun hissəsində 2024-cü ildə ən çox elmi araşdırma aparan departamentlər və fərdi tədqiqatçılar təşəkkürnamə və mükafatlarla təltif olundu. Belə ki, 2024 - cü ildə ən çox elmi məqalələr dərc etdirən Fizika və elektronika departamenti “İlin ən yaxşı departamenti” və həmin departamentin tədqiqatçısı Günel İmanova və İqtisadiyyat və menecment fakultəsinin tədqiqatçısı Mustafa Kartal “İlin ən yaxşı tədqiqatçısı” kimi sertifikat və mükafata layiq görüldülər.

Yekunda Hamlet İsaxanlı tədqiqat mərkəzlərinə və departamentlərə universitetin elmi potensialının daha da gücləndirilməsi, beynəlxalq tədqiqat şəbəkələrinin genişləndirilməsi və müasir elmi çağırışlara cavab verən araşdırmaların həyata keçirilməsi üçün müvafiq tövsiyələr verdi.

Tədbirin sonunda iştirakçılar universitetin elmi inkişafına dair yeni təşəbbüsləri müzakirə edərək, gələcək əməkdaşlıq və layihələr haqqında fikir mübadiləsi apardılar.