2025-ci il  yanvarın 14-15-də  Xəzər Universitetinin nümayəndə heyəti Səudiyyə Ərəbistanına işgüzar səfər çərçivəsində Kral Əbdüləziz Universiteti və Kral Abdullah Elm və Texnologiya Universitetində (KAUST) rəsmi görüşlər keçirdilər.

Xəzər Universitetinin nümayəndə heyəti Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı, İdarəetmə və tələbə işləri üzrə prorektor Prof. İsaxan İsaxanlı, İqtisadiyyat və menecment fakültəsinin dekanı Dr. Raziyə İsaeva, İqtisadiyyat və biznes yüksək təhsil fakültəsinin dekanı Prof. İnqilab Əhmədov, Təbiət elmləri və mühəndislik fakültəsinin dekanı Dr. Fəxrəndə Əfəndiyeva, Təbiət elmləri, sənət və texnologiya yüksək təhsil fakültəsinin dekanı Dr. Günel Bahəddinova və Beynəlxalq əlaqələr şöbəsinin müdiri Fatimə Vəliyevadan ibarət idi.

Səfər zamanı nümayəndə heyəti Ciddə şəhərində yerləşən Kral Əbdüləziz Universitetində müxtəlif fakültə və tədqiqat mərkəzlərinə baş çəkdi.  Nümayəndə heyəti əvvəlcə Kral Fəhd Tibb Tədqiqatları Mərkəzində aparılan elmi-tədqiqat işləri ilə tanış oldu.  Sonra nümayəndə heyəti Turizm fakültəsi, Tətbiqi tibb elmləri fakültəsi və idman sahəsi ilə tanışlıq görüşləri keçirdi. Turizm fakültəsinin tələbələri tərəfindən qonaqlar böyük səmimiyyətlə  qarşılandılar. Nümayəndə heyətinin Kral Əbdüləziz Universitetinin prezidenti Dr. Tareef Yousuf Alaama və prorektorlar ilə keçirdiyi görüşdə əməkdaşlıq imkanları müzakirə olundu.

Yanvarın 15-də isə Xəzər Universitetinin nümayəndə heyəti Thuval şəhərində yerləşən Kral Abdullah Elm və Texnologiya Universitetinə (KAUST) səfər etdi. İlk olaraq Təhsil və akademik məsələlər üzrə müvəqqəti prorektor Prof. Omar Knio, Prof. Arwa Al-Aama, prorektorun müşaviri - Təhsil üzrə əməkdaşlıq və İşə qəbul şöbəsinin direktoru iştirakı ilə əməkdaşlıq məsələlərinin  müzakirəsi məqsədilə görüş keçirildi. Görüşdə hər iki universitet öz fəaliyyətləri haqqında məlumat verdilər. Daha sonra KAUST-un müasir laboratoriyaları, muzeyi və kitabxanasına info-tur təşkil edildi. Universitet rəhbərliyi, professor heyəti və tələbələrin iştirakı ilə nahar yeməyi təşkil olundu.

Görüşlər və təqdimatlar zamanı iki universitet arasında birgə layihələrin həyata keçirilməsi, tələbə mübadiləsi və elmi-tədqiqat sahəsində əməkdaşlıq imkanları geniş şəkildə müzakirə edildi.

Sonra xatirə şəkli çəkildi və hədiyyələr təqdim olundu.