2024-cü il dekabrın 23-də İqtisadiyyat və menecment departamentinin təşkilatçılığı ilə “İqlim dəyişikliyi və dəyişən iqtisadi siyasətlər: problem və perspektivlər” mövzusunda panel müzakirə keçirilmişdir.

Tədbirin açılışında İqtisadiyyat və menecment fakültəsinin dekanı Dr. Raziə İsaeva iqlim dəyişikliyinin qlobal iqtisadiyyata təsirləri və bu istiqamətdə həyata keçirilən tədbirlər barədə geniş  məlumat vermişdir

Panel çərçivəsində üç əsas məruzə təqdim olunmuşdur. İlk olaraq İqtisadiyyat və menecment departamentinin müəllimi Polad Orucov iqlim dəyişikliyi və turizm siyasətləri mövzusunda məruzə ilə çıxış etmişdir. Məruzədə iqlim dəyişikliyinin müxtəlif ölkələrdə turizm sektoruna təsirləri və Azərbaycanın turizm inkişafı strategiyası çərçivəsində əsas prioritetlər elmi əsaslarla təhlil olunmuşdur.

Növbəti məruzə fakültənin tələbəsi Nuran Əliyeva tərəfindən təqdim edilmişdir. Məruzəçi davamlı inkişaf və iqtisadi artım məsələlərinə dair tədqiqat nəticələrini iştirakçılarla paylaşmışdır. Burada davamlı inkişaf problemləri, Azərbaycanda yaşıl iqtisadiyyat, iqlim dəyişikliyi ilə mübarizənin effektiv həll yolları və bu istiqamətdə qabaqcıl dünya təcrübəsi ilə bağlı məsələlərə toxunulmuşdur.

Son olaraq departamentin müəllimi Həsən Rəhimli “İqlim dəyişikliyi: reallıq yoxsa illüziya?” mövzusunda məruzə etmişdir. Çıxış zamanı iqlim dəyişikliyi ilə bağlı proqnozlar, iqlim dəyişikliyinin maliyyələşdirilməsindəki çətinliklər, karbon emisiyası və adambaşına düşən ÜDM arasındakı əlaqə, iqtisadi kiçilmənin zəruriliyi və bu istiqamətdə empirik araşdırmaların nəticələri ilə bağlı məsələlələr şərh olunmuşdur.

Məruzələrdən sonra iştirakçılar mövzu ətrafında müxtəlif yanaşmalar irəli sürərək, geniş müzakirələr aparmışlar. Tədbir yüksək maraqla qarşılanaraq, iqlim dəyişikliyinə dair maarifləndirici və konstruktiv bir müzakirə platforması yaratmışdır.