2024-cü il dekabrın 25-də Xəzər Universiteti Elmi Şurasının növbəti iclası keçirildi. İclası Xəzər Universitetin rektoru Dos. İradə Xəlilova açaraq, gündəlikdəki məsələləri Elmi Şura üzvlərinin nəzərinə çatdırdı.

Sədr İradə Xəlilova  Elmi Şuranın  tərkibində edilən dəyişikliklər barədə şura üzvlərinə məlumat verdi.

Gündəliyin birinci məsələsi olan məzunlar haqqında məlumatları Təbiət elmləri, sənət və texnologiya yüksək təhsil fakültəsinin dekanı Günel Bahəddinova və İqtisadiyyat və biznes yüksək təhsil fakültəsinin dekanı İnqilab Əhmədov təqdim etdilər. Universitetin məzun olan magistratura tələbələrinin qiymətləri, ixtisasları və s. haqqında ətraflı məlumat dinlənildi və müzakirələr aparıldı.

Gündəliyin ikinci məsələsi olan doktorant və dissertantların dissertasiya mövzuları və elmi rəhbərləri haqqında yüksək təhsil fakültələrinin dekanları məlumat verdilər. Hər bir tələbə tədqiqat aparacağı dissertasiya mövzusunun aktuallığı, tədqiqat metodları və s. haqqında danışdı. Şura üzvləri tərəfindən tələbələrə suallar ünvanlandırıldı və müvafiq qərarlar qəbul edildi.  

Sonra rektor İradə Xəlilova  gündəliyin üçüncü məsələsi olan magistratura əsasnaməsi barədə məlumat üçün sözü elmi katib Günel Bahəddinovaya verdi. Elmi katib qeyd etdi ki, əsasnamə hər bir Elmi Şura üzvünə əvvəlcədən göndərilib.  Magistrtura əsasnaməsində magistrantın dissertasiya işinin mövzusunun təyin olunmasından yazılmasına qədər bütün məlumatlar tam aydınlıqla öz əksini tapmışdır.

Elmi Şuranın katibi Günel Bahəddinova gündəliyin dördüncü məsələsi olan Xəzər Universitetinin elmi fəaliyyəti haqqında yazılan illik hesabat haqqında məlumat verdi. O qeyd etdi ki, hesabat  fakültələrin, akademik departamentlərin, elmi tədqiqat mərkəzlərinin və digər müvafiq qurumların elmi fəaliyyəti əsasında yazılmışdır. Məsələ müzakirə olunaraq, hesabat  qəbul edildi.

Elmi Şuranın növbəti məsələsi Dillər və ədəbiyyatlar departamentinin müəllimi fil.ü.f.d. Aynur Qəzənfərqızına  dosent adının verilməsi üçün Azərbaycan Respublikası Prezidenti yanında Ali Attestasiya Komissiyası qarşısında vəsatət qaldırılması ilə bağlı universitetin Elmi Şurasına olunmuş müraciətə baxıldı. Elmi Şuranın katibi iddiaçı haqqında ətraflı məlumat verdi. Sonra hesablama komissiyası yaradılaraq gizli səsvermə keçirildi. Hesablama komissiyasınının sədri tərəfindən nəticə şura üzvlərinə açıqlandı və protokol tərtib edildi.

Daha sonra sədr  İradə Xəlilova gündəliyin altıncı  məsələsi olan  final imtahan sessiyası ilə bağlı məlumatları şura üzvlərinə çatdırmaq üçün sözü tədris işləri üzrə prorektor Məhəmməd Nuriyevə verdi. Prorektor imtahan suallarının formalaşdırılması, imtahan prosesinin təşkili ilə bağlı qaydaları şura üzvlərinin nəzərinə çatdırdı. Dekanlıq və departament rəhbərlərinini bu prosesə çox ciddi hazırlaşmalarını vurğuladı.

Elmi şuranın gündəliyindəki bütün məsələlər müzakirə olunaraq, müvafiq qərarlar qəbul  edildi.