2024-cü il dekabrın 19-22-də Bakı İdman Sarayında “Azərbaycan Nəşriyyatçılar Assosiasiyası” İctimai Birliyi (ANAİB) və Mədəniyyət Nazirliyinin təşkilatçılığı ilə I Bakı Kitab Festivalı keçirilib. Dekabrın 20-də Xəzər Universitetinin əməkdaşları və tələbələri festivalda olublar.

Festival “Yeni ilə yeni kitablarla!” şüarı altında keçirilib. Burada ANAİB üzvləri də daxil olmaqla 30-dan çox nəşriyyat təmsil olunub.

Festivalın açılış mərasimində ANAİB-nin sədri Şamil Sadiq festivala hazırlıq prosesi barədə ətraflı danışıb. Xalq şairi Sabir Rüstəmxanlı, Türkiyə Üsküdar Universitetinin rektoru Nazife Güngör, Mədəniyyət Nazirliyi yanında İctimai Şuranın sədri, Azərbaycan Atatürk Mərkəzinin direktoru akademik Nizami Cəfərov, Milli Məclisin deputatı Fazil Mustafa, Mətbuat Şurasının sədri Rəşad Məcid və Azərbaycanın Əməkdar artisti Rafiq Həşimov çıxışlarında kitab və mütaliənin əhəmiyyətini, cəmiyyətin inkişafındakı rolunu diqqətə çatdırıblar.

Festivalda tanınmış yazıçı və şairlərin təqdimatları və avtoqraf sessiyaları, məşhur şəxsiyyətlərlə görüşlər, poeziya saatları, eləcə də uşaqlar üçün ucadan nağıl qiraətləri keçirilmişdir.