Xəzər Universitetinin Kimya və biologiya müəllimliyi ixtisası üzrə təhsil alan III kurs tələbəsi Aygün Muradova, beynəlxalq səviyyədə tanınan və iqlim dəyişikliyi ilə mübarizəyə yönəlmiş "Global Youth Climate Training Programme 2024" proqramını müvəffəqiyyətlə başa vuraraq, beynəlxalq sertifikata layiq görülmüşdür. Bu nüfuzlu proqram Oxford Universiteti, Smith School of Enterprise and the Environment və Global Youth Coalition tərəfindən təşkil olunaraq, qlobal miqyasda gənclərin iqlim təşəbbüslərinə dəstək olmağı hədəfləyir.

 Aygün Muradova bu təlim proqramında iştirak etməklə iqlim dəyişikliyi sahəsində biliklərini artırıb və yeni təcrübələr əldə edib. O, bu təlim çərçivəsində dayanıqlı inkişaf, resursların idarə olunması, qlobal iqlim siyasəti kimi mövzularda təcrübə qazanmışdır.

Aygün Muradova, həmçinin, COP29-da könüllü fəaliyyəti zamanı Global Youth Coalition  və Oxford Universitetinin əməkdaşları, eləcə də proqramın həmtəşkilatçılarından biri olan Agustin Ocaña ilə şəxsən tanış olmaq imkanı əldə edib. “Agustin ilə tanışlıq mənim üçün çox əlamətdar oldu. Onun iqlim dəyişikliyi ilə bağlı yanaşmaları və dünya gənclərinə dəstək missiyası mənə böyük motivasiya verdi” - deyə Aygün qeyd edib.

Proqramın digər təşkilatçısı olan Alexis McGivern`ə də təşəkkürünü bildirən Aygün Muradova, həm Alexis`ə, həm də Agustin`ə iqlim dəyişikliyi ilə mübarizə aparan gənclərə verdikləri dəstək üçün minnətdarlığını bildirib. “Hər iki təşkilatçının bu sahədə gördükləri işlər bizi daha böyük məqsədlərə çatmaq üçün ilhamlandırır,” - deyə o, vurğulayıb.