2024-cü il dekabrın 9-da Xəzər Universitetində Humanitar, təhsil və sosial elmlər fakültəsinin təşkilatçılığı və dekan müavini Pərvin Kərimovanın moderatorluğu ilə siyasi ekspert Ramiz Yunusun “Dünyada gedən geosiyasi proseslər, onların təsirləri və Cənubi Qafqaz regionu üçün mümkün riskləri” mövzusunda seminarı keçirilmişdir. Seminarda Xəzər Universitetinin İctimai əlaqələr və media üzrə direktoru Əlövsət Əmirbəyli, Tarix və arxeologiya departamentinin müəllimləri Dr. Yaqub Məmmədov, Dr. Söhrab Mustafayev, Ceyran Məmmədova, Tarix müəllimliyi və Tarix və coğrafiya müəllimliyi ixtisaslarında təhsil alan tələbələr, eləcə də, ictimaiyyət və mədəniyyət xadimləri, o cümlədən əməkdar incəsənət xadimi Cavanşir Quliyev iştirak etmişdir.

Məruzəçi Rusiya - Ukrayna müharibəsi, İsrail - Fələstin toqquşmaları və eləcə də Suriya hadisələri və onun regiona təsirləri haqqında, eləcə də, Vətən müharibəsindən sonra regionda yaranmış reallıqlar, Zəngəzur dəhlizi, Azərbaycan - Ermənistan sülh müqaviləsi və digər məsələlər kontekstində mülahizələrini bölüşmüşdür. Sonda qonaqları, müəllimləri və tələbələri düşündürən məsələlər ətrafında geniş müzakirə aparılmışdır.