2024-cü il noyabrın 21-24-də Xəzər Universiteti Əcnəbi Tələbə klubunun vitse-prezidenti Abdullahi Aduagba Yahaya Yunanıstanın Saloniki şəhərində keçirilən Erasmus Tələbə Şəbəkəsi (ETŞ-ESN) Baş Assambleyasının iclasında iştirak edib. Qeyd edək ki, ETŞ Avropanın ən böyük tələbə təşkilatlarından biridir və Baş Assambleya təşkilatın fəaliyyətinə dair mühüm məsələlərin müzakirə və səsvermə ilə həll edildiyi əsas qərarverici orqandır.
 Abdullahi Xəzər Universitetinin Əcnəbi Tələbə klubunun Azərbaycanda yeni ETŞ yerli bölməsi kimi qəbul olunması üçün ETŞ Beynəlxalq Şurasına və 45 ölkədən olan ETŞ milli nümayəndələrinə müraciət təqdim edib. Sonra, qaydaya görə, sual-cavab sessiyasında Abdullahi klub haqqında iştirakçılara geniş məlumat verib və klub “ESN Khazar”  adı ilə yekdilliklə Azərbaycanda ETŞ yerli bölməsi kimi təsdiqlənib.

Abdullahinin plenar sessiyada əsas məsələlər üzrə fəal iştirakı da nümayəndələr və Beynəlxalq Şura üzvləri tərəfindən xüsusi təqdir edilib və o, qrup lideri seçilib,  ETŞ-in strukturu, idarəçiliyi və maliyyələşdirilməsi mövzusunda çıxış edib.

Vitse-prezident Abdullahi Baş Assambleyadan sonra milli təşkilatların nümayəndələri ilə məsləhətləşmələr aparıb, onların təcrübəsini öyrənib. Plenar Sessiyanın sonunda o, ETŞ Beynəlxalq Şurasının üzvlərinə və nümayəndələrə hədiyyə və suvenirlər təqdim edib.