2024-cü il dekabrın 5-6-da Xəzər Universiteti Dillər və ədəbiyyatlar departamentinin təşkilatçılığı,

Azərbaycan Respublikasının Diasporla İş üzrə Dövlət Komitəsi, Azərbaycan Diasporuna Dəstək Fondu, Nar, Müstəqil Sənayeçi və İş Adamları Dərnəyi, AMEA, Türkiyənin Ege, Atatürk, Qars Qafqaz universitetləri və Özbəkistanın İqtisadiyyat və Pedaqogika Universitetinin dəstəyi və tərəfdaşlığı ilə   “Türk dünyasında Azərbaycan dili və ədəbiyyatı araşdırmaları” mövzusunda I Beynəlxalq Elmi Simpozium keçirilib.

Simpozium Azərbaycan dilinin və ədəbiyyatının ölkəmizdən kənarda, xüsusilə də Türk dünyasında mövcud vəziyyətini, onun tədqiqi və təbliği istiqamətində həyata keçirilən işləri geniş platformada müzakirə etmək, bu sahədəki problemləri və perspektivləri müəyyənləşdirmək məqsədilə keçirilib.

Xəzər Universitetinin Mərmər salonunda keçirilən açılış mərasimində Xəzər Universitetinin Dillər və ədəbiyyatlar departamentinin müdiri, Dos. Dilbər Zeynalova simpoziumun Türk dünyası arasında bir körpü yaradacağına, Azərbaycan dilinin və ədəbiyyatının beynəlxalq aləmdə təbliğinə mühüm töhfə verəcəyinə ümidvar olduğunu bildirib. 

Tədbirdə Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı simpoziumun mövzusunun əhəmiyyətini və hansı dəyərləri daşıdığını əsaslandırmış, “Divanü-lüğət-it-türk” və “Kitabi-Dədə Qorqud” kimi kultlardan müasir dövrə qədər tarixi, milli, siyasi, elmi əhəmiyyəti olan bir çox mənbə və şəxslərə istinad edərək, Azərbaycan və Türk dünyası üçün ortaq hesab olunan dəyərlərdən danışıb, simpoziumun da məhz eyni xətti izlədiyini və onun geniş aspektli inkişaf üçün vacibliyini vurğulayıb.

Ege Universitetinin professoru, Türkiyə Yazarlar Birliyinin, Avrasiya Yazarlar Birliyinin, Türk Mədəniyyəti Araşdırma İnstitutunun, Azərbaycan Yazıçılar Birliyinin üzvü Prof. Yavuz Akpınar, Diasporla İş üzrə Dövlət Komitəsinin şöbə müdiri, tarix üzrə fəlsəfə doktoru Cavid İsmayıl, Nar İctimaiyyətlə Əlaqələr və Korporativ Ünsiyyət departamentinin direktoru, Xəzər Universitetinin məzunu Hökümə Kərimova çıxış edərək, simpoziumun Türk dünyasının elmi və mədəni inkişafındakı əhəmiyyətindən danışıblar. 

Türk dünyasında azərbaycanlıların dil və ədəbiyyat məsələlərinə diqqət çəkmək, linqvistik-filoloji tədqiqatları, eyni zamanda, ədəbi şəxsiyyətlərin yaradıcılığının tədqiq prosesini aktuallaşdırmaq, Türk dünyası ziyalıları, tədqiqatçıları arasında kommunikasiyanı gücləndirmək məqsədilə Azərbaycan Türkiyə, Özbəkistan, Qırğızıstan, Qazaxıstan, Şimali Kipr Türk Respublikası kimi türk dövlətlərini elm və mədəni inkişaf naminə bir araya toplayan simpozium panellər üzrə elmi çıxışlarla davam edib.

İki gün ərzində simpoziumda 100-ə yaxın elmi tədqiqatçı müxtəlif mövzulu tezislərlə əyani və onlayn formada iştirak ediblər. 

Dekabrın 6-da simpozium çərçivəsində Xəzər Universitetinin “Dünya” məktəbində Qars Qafqaz Universitetinin əməkdaşları dosent İlkin Qulusoy və Sema Şahin Dedenin “Türkiye türkçesi ve Azerbaycan türkçesi karşılaştırmalı deyim bilgisi” kitabının təqdimatı olub.

Simpozium öz işini Azərbaycanın böyük sənətkarı, turançılıq məfkurəsinin təbliğatçısı Cəfər Cabbarlının anadan olmasının 125 illiyinə həsr olunmuş elmi, musiqili bədii proqramla yekunlaşdırıb.