Siyasi elmlər və fəlsəfə departamentinin müdiri Dos. Orxan Vəliyev bu il səkkizincisi təşkil olunan və dünyanın nüfuzlu tədbirlərindən olan TRT WORLD FORUM-da iştirak etmişdir. Forum TRT WORLD kanalının təşkilatçılığı ilə 2024-cü il noyabrın 29-30-da keçirilərək, “Qırılma nöqtəsində dünya: böhran və dəyişikliklərin idarə olunması” mövzusuna həsr olunmuşdu.

Forumun açılışı Türkiyə Respublikasının Prezidenti Rəcəb Tayyib Ərdoğanın dərin məzmunlu çıxışı ilə gerçəkləşmişdir. Ardınca xüsusi qonaqların nitqləri və tematik panellərlə davam edən forum dünyanın müxtəlif ölkələrindən olan mütəxəssisləri, siyasətçiləri və akademikləri bir araya gətirmişdir. Forumun ikinci günündə Türkiyənin xarici işlər naziri Hakan Fidanın iştirakı ilə mühüm müzakirələr aparılmışdır.

Dos. Orxan Vəliyev “Mərkəzi Asiya və Qafqaz” mövzusuna həsr olunmuş paneldə spiker qismində çıxış etmişdir. Panelin işinə Türk Dövlətləri Təşkilatı (TDT), Özbəkistan Xarici İşlər Nazirliyi və digər regional təşkilatlardan yüksək səviyyəli nümayəndələr qatılmışlar. Müzakirələr zamanı Azərbaycan Prezidenti İlham Əliyevin “Bizim ailəmiz Türk Dünyasıdır” sözləri xüsusilə vurğulanmış və Türk dövlətləri arasındakı birlik mövzusunda geniş fikir mübadiləsi aparılmışdır.

Dos. Vəliyev öz çıxışında Prezident İlham Əliyevin Bişkek Sammitində (2024) səsləndirdiyi təşkilatın büdcəsinin onun qarşıya qoyduğu strateji hədəfləri həyata keçirmək üçün kifayət etməməsi fikrini xatırlatmış və bu istiqamətdə lazımi addımların atılmasının vacibliyini qeyd etmişdir.

Forum qlobal böhranlar və dəyişikliklərin effektiv idarə olunması mövzusunda beynəlxalq əməkdaşlıq üçün platforma rolunu oynamaqla yanaşı, Türk Dünyasının gələcək perspektivlərini müzakirə etmək üçün mühüm imkan yaratmışdır.