2024-cü il dekabrın 2-də Xəzər Universitetində Psixologiya departamentinin koordinatoru Mələk Kərimovanın təşkilatçılığı ilə "Psixoklinik" mərkəzinin rəhbəri və Xəzər Universitetinin məzunu olan Anara Quliyeva ilə birgə disleksiya mövzusunda maarifləndirici təlim keçirildi. Təlimin əsas məqsədi öyrənmə çətinliyi yaşayan uşaqlarla işləyən pedaqoq, psixoloq və defektoloqların maarifləndirilməsi və bu sahədə yeni təlim metodlarının öyrənilməsindən ibarət oldu.

Təlimdə uşaq psixoloqu Anara Quliyeva disleksiyanın müalicəsində oyun terapiyasının tətbiqinin faydalarını və düzgün metodların necə işlədiyini izah etdi. Oyun terapiyasının, uşaqlara təhsil prosesində özlərinə inam qazandırmaqla yanaşı, müalicəni daha əyləncəli və effektiv hala gətirdiyini vurğuladı.

Psixoloq Mələk Kərimova isə disleksiyalı uşaqların ailələrində qarşıya çıxan münasibət çətinlikləri və müəllimlərin bu uşaqlara yanaşmalarında edilən səhvlər barədə danışdı. Onun sözlərinə görə, disleksiya ilə bağlı yanlış təsəvvürlər və stereotiplər uşaqların inkişafını məhdudlaşdıra bilər. Müəllimlər və valideynlər bu cür uşaqlara qarşı empatiya ilə yanaşmalı, onlara xüsusi dəstək və anlayış göstərməlidirlər.

Təlimə Bakı və regionlardan gələn pedaqoq, psixoloq və defektoloqlar çoxsaylı suallar verərək, müzakirələrə qoşuldular.