2024-cü il noyabrın 26-27-də Xəzər Universitetində Rusiyanın Dubna şəhərində yerləşən Birləşmiş Nüvə Tədqiqatları İnstitutu (BNTİ) alimlərinin iştirakı ilə seminar keçirildi. Seminarda Xəzər Universitetinin professor-müəllim heyəti, gənc tədqiqatçıları, həmçinin müxtəlif universitetlərin və elmi - tədqiqat institutlarının rəhbərləri iştirak etdilər.

Seminardan əvvəl Xəzər Universiteti ilə BNTİ arasında protokol görüşü təşkil edilmiş və əməkdaşlıq perspektivləri müzakirə olunmuşdur.

Seminar Xəzər Universiteti Kamera orkestrinin konsert proqramı ilə başlanmışdır.

Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı öz açılış nitqində universitetin tarixi, nailiyyətləri və beynəlxalq əməkdaşlıq imkanları haqqında geniş bəhs etmişdir. Sonra BNTİ-nin direktoru, akademik Qriqoriy Trubnikov institutun fəaliyyəti və həyata keçirilən geniş miqyaslı elmi tədqiqatlar haqqında ətraflı məlumat vermişdir. Xəzər Universiteti Mühəndislik Biomaterillar Tədqiqat Mərkəzinin direktoru Prof. Soodabeh Davaran çıxışında belə elmi tədbirlərin böyük əhəmiyyətini vurğulamışdır.

Seminar zamanı Xəzər Universiteti ilə BNTİ arasında elmi sahədə əməkdaşlığın gücləndirilməsini nəzərdə tutan mühüm bir əməkdaşlıq müqaviləsi imzalanmışdır. Bu müqavilə gələcəkdə birgə elmi-tədqiqat layihələrinin həyata keçirilməsi, eləcə də universitetlər və institutlar arasında qarşılıqlı təcrübə mübadiləsinin təşviqi kimi məsələləri əhatə edərək, yerli və qlobal səviyyədə birgə tədqiqatlar üçün yeni imkanlar açacaqdır.

Seminarın ilk günündə Dr. Aleksandr Buqay və Dr. Norbert Kucerka radiobiologiya və radiasiyanın tibbdə tətbiqləri haqqında iştirakçılara geniş məlumat vermişlər. İkinci gün isə Dr. Yuriy Severyuxin və Mixail Zarubin fiziki-kimyəvi streslərə tolerantlığın və radiorezistəntliyin molekulyar mexanizmləri haqqında təqdimatlarla çıxış etmişlər.

Tədbirin sonunda iştirakçı alimlərə Xəzər Universitetinin rektoru Dr. İradə Xəlilova tərəfindən sertifikatlar təqdim olunmuşdur.