2024-cü il noyabrın 29-da Xəzər Universitetinin tərəfdaş olduğu Erasmus+ PİCASP layihəsi çərçivəsində MİRAS İctimai Birliyinin sədri, tarix üzrə fəlsəfə doktoru Fariz Xəlillinin rəhbərliyi ilə Xəzər Universitetinin müəllim və tələbələri (Turizm işinin təşkili ixtisası)  üçün Bakı şəhərindəki Zərgərpalan hamamında aparılan tədqiqat sahəsində arxeoloji ekspedisiya təşkil edilmişdir.

Ekspedisiya zamanı iştirakçılar üçün əvvəlcə hamam üzrə ekskursiya keçirilmiş, hamamın tarixi, tikildiyi memarlıq üslubu,  orada aparılan işlər, ortaya çıxan nəticələr və əldə olunan tapıntılar barədə onlara geniş məlumat verilmişdir. Sonra iştirakçılara hamamın konservasiyası üzrə işlərin necə aparıldığı, konservasiya zamanı istifadə olunan materiallar, onların növləri və tərkibi, hazırlanma  və istifadə qaydaları, arxeoloji abidələrin konservasiya və bərpası zamanı əməl edilməsi vacib olan qaydalar və digər məqamları əhatə edən təlim keçirilmişdir. Ekspedisiyanın üçüncü hissəsində iştirakçılar əldə etdikləri biliklər əsasında və tədqiqat sahəsində çalışan mütəxəssislərin nəzarəti altında abidənin konservasiyasında iştirak etmişlər.