2024-cü il noyabrın 20-də Özbəkistanın Daşkənd şəhərindəki Amerika Texnologiya Universitetində (ATU) həmin universitetlə Xəzər Universiteti arasında tədris, mədəni mübadilə və peşəkar inkişafı təşviq etmək məqsədilə güclü tərəfdaşlıq qurmaq üçün Anlaşma memorandumu  imzalanıb.

Xəzər Universitetinin təsisçisi,  Direktorlar və Qəyyumlar Şurasının sədri Prof.Akad. Hamlet İsaxanlı və ATU-nun qurucu rektoru Prof. Dr. Said Irandoust tərəfindən imzalanan Anlaşma memorandumu hər iki təhsil müəssisəsinin tələbələri, professor-müəllim heyəti və əməkdaşları üçün təhsil və tədqiqat imkanlarının genişləndirilməsinə dair ortaq öhdəliyi nəzərdə tutur.

Mərasimdə Cintana Education-ın prezidenti, ATU-nun qurucu prezidenti Prof. Rick Shangraw və ATU-nun qurucu tərəfdaşı Timur Rəhmanov, eləcə də ATU-nun digər rəsmiləri çıxış edərək, bu əməkdaşlığın əhəmiyyətini vurğuladılar.

Qeyd edək ki, Arizona Dövlət Universiteti (ADU) tərəfindən dəstəklənən ATU Özbəkistanda 2024-cü ildə Prezident fərmanı ilə təsis edilmiş yeni özəl beynəlxalq universitetdir. ADU-Cintana Alyansının üzvü olaraq ATU yerli və qlobal karyera uğuru üçün işəgötürən yönümlü təhsil vermək məqsədilə ADU-nun ciddi akademik standartlarını və innovativ tədris metodlarını tətbiq edir.

Memorandum aşağıdakı sahələrdə əməkdaşlıq üçün yol açır: tələbə və müəllim mübadiləsi, birgə tədris və tədqiqat təşəbbüsləri, peşəkar inkişaf proqramları, ömürboyu öyrənmə fəaliyyətləri, yay-  qış tələbə düşərgələri, mədəniyyətlərarası və ictimai əlaqələr layihələri.

Bu tərəfdaşlıq qarşılıqlı anlaşmanı və qlobal əməkdaşlığı gücləndirməklə yanaşı, tələbə və müəllim heyəti üçün imkanları artırır.