2024-cü il oktyabrın 29-30-da Xəzər Universitetində yeni yaradılmış Mühəndislik Biomateriallar Tədqiqat Mərkəzinin (MBTM) açılışı və  mərkəzin ilk beynəlxalq seminarı təşkil olunmuşdur. Proqram 2 əsas hissədən - musiqili bədii və biomaterialların həyat elmlərində tətbiqinə dair müasir yanaşmaları əhatə edən elmi məruzələrdən ibarət olmuşdur. Seminarda Xəzər Universitetinin professor-müəllim heyəti və tələbələri ilə yanaşı, digər universitetlərin rəhbərləri, elmi tədqiqat institutlarının alimləri, özəl şirkətlərin nümayəndələri, sənaye üzrə mütəxəssislər və iş adamları  iştirak etmişdir.

Seminarın bədii proqramı Xəzər Universitetinin Musiqi və incəsənət departamentinin müdiri, əməkdar müəllim, pianoçu Zülfiyyə Sadıqovanın rəhbərliyi ilə təşkil olunmuşdur. Tədbir universitetin Kamera Orkestrinin ifası ilə açılmış və Prezident mükafatçısı Orxan Həşimovun dirijorluğu ilə davam etmişdir. Proqramda Azərbaycan və dünya musiqisinin görkəmli əsərləri təqdim olunmuşdur. Xüsusilə Üzeyir Hacıbəylinin "Leyli və Məcnun" operasından parçalar, Qara Qarayevin "Yeddi Gözəl" baletindən rəqslər və Asəf Zeynallının "Ölkəm" əsəri böyük maraqla qarşılanmışdır.

Seminarın elmi hissəsi Xəzər Universitetinin qurucusu, Direktorlar və Qəyyumlar Şurasının sədri Prof.Akad. Hamlet İsaxanlının açılış nitqi ilə başlamışdır. O, elmi tədqiqat mərkəzinin yaradılmasının əhəmiyyəti və fəaliyyət istiqamətlərinin cəmiyyət və sənaye üçün vacibliyini vurğulamışdır. Sonra, mərkəzin direktoru Prof. Soodabeh Davaran mərkəz üzvlərini və iştirakçıları salamlamış, yeni mərkəzin vizyonu, məqsədləri və istiqamətləri barədə ətraflı məlumat vermişdir. Həmçinin İran, Türkiyə, İsveçrə, Kipr və Azərbaycandan olan mərkəz üzvləri də seminarda iştirak etmiş, biomateriallarla bağlı müxtəlif mövzular üzrə məruzələr təqdim olunmuş və geniş müzakirələr aparılmışdır.

Seminarın əsas məqsədi biomateriallar sahəsində universitet-sənaye əməkdaşlığını genişləndirmək, innovativ yanaşmaları ictimaiyyətə təqdim etmək və bu sahədə yeni perspektivlər açmaq olmuşdur.  Seminar biomaterialların elmi və tətbiqi potensialını həm tədris, həm də sənaye nümayəndələrinə geniş şəkildə nümayiş etdirmişdir.

 Sonda mərkəz üzvlərinə Xəzər Universitetinin adından hədiyyələr təqdim olunmuşdur.