2024-cü il noyabrın 11-də Türkiyə Respublikası Prezident Administrasiyasının Kommunikasiya İdarəsi tərəfindən Bakıda keçirilən Cop29 çərçivəsində “Abşeron” hotelində "Qlobal iqlim böhranında strateji kommunikasiya" mövzusunda forum təşkil olunub.

Forumda Türkiyə Respublikası Prezident Administrasiyasının Kommunikasiya İdarəsinin sədr müvani Çağatay Özdemir, Türkiyə Respublikasının Azərbaycandakı səfirliyinin media müşaviri Dr. Cihangir İşbilir, azərbaycanlı və əcnəbi mütəxəssislər iştirak etmişlər.

Açılış nitqlərindən sonra Siyasət, İqtisadiyyat və Toplum Araşdırmaları Fondunun (SETA) Vaşinqton ofisinin direktoru Kılıç Buğra Kanat`ın moderatorluğu ilə keçən forumda digər mütəxəssislərlə yanaşı, Xəzər Universiteti Siyasi elmlər və fəlsəfə departamentinin müdiri Dos. Orxan Vəliyev də çıxış edərək, mövzu ilə əlaqədar mülahizələrini bildirmişdir.

 Dos. Vəliyev çıxışında birinci və ikinci sənaye inqilabları ilə insanın təbiətə kəskin müdaxiləsindən, iyirminci əsrin ikinci yarısından isə təbiətə müdaxilənin ilkin fəsadları ortaya çıxmağa başlayanda alimlərin siyasətçilərin diqqətini iqlim böhranına çəkməyə çalışdıqlarından danışmışdır.. O, üçüncü sənaye inqilabı ilə bərabər iqlim dəyişikliyinin qlobal bir məsələ kimi gündəliyə gələrək, siyasət və iqtisadiyyatda istifadə olunan sistemlərə təsir göstərməyə başladığını qeyd etmiş,   fiziki, bioloji və elektron dünyanı bir-birinə yaxınlaşdıran müasir dördüncü sənaye inqilabının isə iqlim dəyişikliyi sahəsində reqional və qlobal əməkdaşlığı dövlətlər üçün zərurətə çevirdiyini nəzərə çatdırmışdır. Azərbaycan Respublikasının ev sahibliyi etdiyi Cop29   iqlim böhranları ilə üzləşən dünya qarşısında yeni imkanlar açacaqdır – deyə, natiq çıxışını bitirmişdir.