2024-cü il noyabrın 1-də Xəzər Universitetində  Azərbaycan Kibertəhlükəsizlik Mərkəzinin (AKM) nümayəndələri məlumat sessiyası keçirib. Sessiya zamanı Rəqəmsal İnkişaf və Nəqliyyat Nazirliyi (RİNN), İnnovasiya və Rəqəmsal İnkişaf Agentliyinin (İRİA) İsrailin “Technion” Texnologiya İnstitutu ilə birgə təsis etdiyi Azərbaycan Kibertəhlükəsizlik Mərkəzinin (AKM) təlimlərinin yeni V dalğası üçün qeydiyyat açıq elan olunub.

Azərbaycan Kibertəhlükəsizlik Mərkəzinin icma meneceri Leyla Kərimli dünyada və ölkədə mövcud kiber təhdidlər və onun zərərləri haqqında ətraflı məlumat verib. Bildirib ki, AKM təlimlərinin keçirilməsində məqsəd ölkədəki kibertəhlükəsizlik sahəsi üzrə kadrların ən yüksək səviyyədə bilik və bacarıqlarını formalaşdırmaqdır. Mərkəzin nümayəndəsi Xəzər Ubiversitetinin tələbələrini təlimlərin V dalğasına qoşulmağa çağırıb.

AKM-nin əməkdaşları Nemət Rəhimli, Orxan Abdullayev və Fərzəli Vəliyev  bildiriblər ki, mərkəzin icra etdiyi təlimlər İsrailin “Technion” Texnologiya İnstitutunun təlim proqramına əsaslanır. Nemət Rəhimli qeyd edib ki, xarici təlimçilər komandası təlimlərə müraciət etmiş iştirakçıların həm İT biliklərini yoxlayır, həm də müsahibə bacarıqlarını testdən keçirir. Nəticədə hər iki mərhələdə uğur qazanmış namizədlərə “Blue team” (müdafiə) və “Red team” (hücum) istiqamətində 6 aylıq təlimlər (tam təqaüdlü şəkildə) keçilir. Təlimi uğurla bitirənlərə “Technion” İnstitutunun rəsmi sertifikatı verilir.  

Sessiya zamanı vurğulanıb ki, mərkəzin indiyədək 180-ə qədər məzunu olub və hazırda onlar həm dövlət qurumlarında, həm də özəl sektorda çalışırlar.