2024-cü il  noyabrın 5-6-da Bakı Dövlət Universitetində (BDU) və Xəzər Universitetində uzun illər çalışmış professor Qüdrət İsmayılzadənin anadan olmasının 90 illiyi münasibətilə BDU-da “Qarabağ və Zəngəzurun mədəni irsi arxeoloji və etnoqrafik tədqiqatlarda” mövzusunda beynəlxalq elmi konfrans keçirilib.

AMEA Arxeologiya və Antropologiya İnstitutu və BDU-nun birgə təşkilatçılığı ilə keçirilən konfransda Xəzər Universitetinin Tarix və arxeologiya departamentinin müəllimləri Dr. Yaqub Məmmədov “Azıx mağarasında hansı insan növləri yaşayıb?”, Orxan Zamanov “Qüdrət İsmayılzadənin elmi-yaradıcılıq irsində silah və hərb işi problemi” və Dr. Yaqub Məmmədov və Ülviyyə Səfərova “Tağlar mağarasında arxeoloji tədqiqatların bərpası” mövzularında məruzələr ilə çıxış ediblər. Qeyd edək ki, Dr. Yaqub Məmmədov və Ülviyyə Səfərova bu il 38 illik fasilədən sonra Tağlar mağarasında başlanan arxeoloji ekspedisiyanın üzvləri olublar.