2024-cü il oktyabrın 3-4-də Xəzər Universitetindən Fəxrəndə Əfəndiyeva (Təbiət elmləri və mühəndislik fakültəsinin dekanı), Fəridə Tatardar (Fizika və elektronika departamentinin müdiri) və Səlimə Əhmədovadan (İnkişaf Mərkəzinin Layihə meneceri) ibarət heyət İtaliyanın Milan şəhərindəki Milan Politexnik Universitetində keçirilən tədbirdə iştirak edib. Tədbir "Azərbaycan, Gürcüstan və Ukraynada Avropa enerji səmərəliliyi üzrə qarşılıqlı yardım tərəfdaşlığı - 3E-Tərəfdaşlıq" Erasmus+ CBHE layihəsi çərçivəsində təşkil olunmuşdu.

Tədbir inkişaf və texnoloji yeniliklər mövzusunda müzakirələrlə başlandı. Təqdimatlardan ən əhəmiyyətlisi Prof. F. Grassi`nin "Milan Politexnik universiteti tələbələri ətraf mühit texnologiyalarının və ağıllı infrastrukturların səfirləri kimi" mövzusunda çıxışı oldu.

Prof. M. Delfanti "Avropada bərpa olunan enerji mənbələrinin dəstəklənməsi üçün vasitələr" mövzusunda qiymətli məlumatlar verdi.

Digər sessiyalarda Prof. M. Iacchetti "Birbaşa külək enerj konversiyası sistemləri üçün generatorlar" və Prof.  A. Berizzi "Təxminən 100% BEM əsaslı generasiyada enerji sistemi sabitliyi problemləri" mövzularında çıxış etdilər, bərpa olunan enerji mənbələrinin mövcud enerji sistemlərinə inteqrasiyasının çətinliklərini araşdırdılar.

Prof. C. Del Pero isə "Tikinti sektorunun dekarbonizasiyası - məhdudiyyətlər və imkanlar" mövzusunda təqdimatla çıxış edərək, tikinti sənayesində karbon ayaq izi azaltmaq üçün həm çətinliklər, həm də innovativ həllər barədə məlumat verdi.

İştirakçılar Leonardo Kampusundakı laboratoriyalarda enerji texnologiyalarındakı ən son yeniliklərlə tanış oldular.

Tədbir 3E-Tərəfdaşlıq layihəsi üçün əhəmiyyətli bir addım oldu, iştirak edən təşkilatlar arasında əməkdaşlığı və bilik mübadiləsini gücləndirdi.