2024-cü il  oktyabrın 21-də AMEA Nəsimi adına Dilçilik İnstitutunun Gənc Alim və Mütəxəssislər Şurasının təşkilatçılığı ilə Şuşa şəhərinin “İslam Əməkdaşlıq Təşkilatının Gənclər Paytaxtı” seçilməsinə həsr olunmuş “İslam mədəniyyətinin incisi Şuşa – gənc dilçi alimlərin tədqiqatlarında” adlı elmi sessiya keçirilmişdir.

İnstitutun elmi işlər üzrə direktor müavini Dos. Baba Məhərrəmli açılış nitqi söyləmişdir. Xəzər Universiteti Dillər və ədəbiyyatlar departamentinin müəllimi Dr. Sevinc Qəmbərova “Azərbaycan dilinin dialekt sistemində Şuşa şivəsinin mövqeyi”, institutun Türk dilləri şöbəsinin böyük elmi işçisi Dr. Dilbər Camali “Şuşalı ziyalılar”, Toponimika şöbəsinin kiçik elmi işçisi Ayşən İsmayıllı “Qarabağın incisi Şuşa” mövzularında məruzə etmişlər.

Qədim dillər və mədəniyyətlər şöbəsinin müdiri fil.e.d. İlhami Cəfərsoy, Toponimika şöbəsinin müdiri Dos. Elçin İsmayılov, Türk dilləri şöbəsinin aparıcı elmi işçisi Dos. Qətibə Mahmudova çıxış edərək, Azərbaycanın incisi Şuşa şəhərinin cari il üçün “İslam Əməkdaşlıq Təşkilatının Gənclər Paytaxtı” seçilməsinin əhəmiyyətindən, Şuşa ilə bağlı xatirələrindən danışıblar.

Elmi sessiya müzakirələrlə başa çatmışdır.