2024-cü il oktyabrın 22-də Bakı Muzey Mərkəzində Xəzər Universiteti ilə Türkiyənin İnsan və Mədəniyyət Hərəkatının birgə təşkil etdiyi "Zamanını aşan miras - İpək yolu" adlı beynəlxalq sərgi-konfrans Türk dünyasınının elm və sənət adamlarının iştirakı ilə öz işinə başlamışdır. Konfransda Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı, Türkiyənin Azərbaycandakı səfiri Dos.Dr. Cahid Bağcı və İnsan və Mədəniyyət Hərəkatının rəhbəri Məryəm Güney açılış çıxışları etmişlər.
Prof.Akad. Hamlet İsaxanlı bir çox ölkədə keçirilən bu silsə sərgi-konfransların önəmindən bəhs edərək xüsusilə sənətin, elmin birləşdirici xarakterinə diqqət çəkmiş, XII-XIII əsrlər İpək yolu mədəniyyətinin inkiafı ilə bağlı konfrans iştirakçılarına maraqlı məlumatlar vermişdir.
Sərginin açılışından sonra davam edən konfransın panel hissəsində Xəzər Universitetinin Tarix və arxeologiya departamentinin müdiri Dos. Telman Nüsrətoğlu "İpək yolu, iqlim böhranları və təhlükəsizlik" mövzusunda geniş məruzə ilə çıxış etmişdir.
Xatırladaq ki, Türkiyə Böyük Millət Məclisi (TBMM) və Türkiyə Mədəniyyət Nazirliyinin himayəsində həyata keçirilən, İpək yolu güzərgahı üzərində yerləşən ölkələri əhatə edən silsilə sərgi-konfranslarda Çin, Qazaxıstan, Əfqanıstan, Pakistan, Özbəkistan, Azərbaycan, Qırğızıstan, Tatarıstan və İrandan olan 41 sənətkarın mövzu ilə bağlı xüsusi olaraq hazırladıqları xəttatlıq, təzhib, miniatür, əbru, qələm işi (qrafik xətt), ağacoyma, sədəf düzmə, keramika, zinət əşyaları və digər əsərlərindən ibarət sərgi nümayiş olunur. 41 elm adamının da İpək yolunun tarixi, istiqamətləri, önəmli mərkəzləri, elm və sənəti, dil və ədəbiyyatı, memarlıq və ticarətini incələyən məruzələri dinləniləcək.
Bu beynəlxalq layihənin Azərbaycandakı tərəfdaşı kimi Xəzər Universiteti seçilmişdir.
Ölkə saytları tədbir haqqında xəbər yayımlayıblar.
Copyright © Xəzər Universiteti, 2025
