Siyasi elmlər və fəlsəfə departamentinin müdiri Dos. Orxan Vəliyev 2024-cü il oktyabrın 18-də Azərbaycan Respublikası İstanbul Baş Konsulluğunun dəvəti ilə mühacirət tarixinin tədqiqatçısı Dilqəm Əhmədin Baş Konsulluğun dəstəyi ilə nəşr edilmiş “Son mənzili İstanbul olan azərbaycanlılar” kitabının təqdimatında iştirak etmişdir.

Kitab başda Əhməd Bəy Ağaoğlu, Əli Bəy Hüseynzadə olmaqla Azərbaycan Xalq Cümhuriyyətinin qurulmasında iştirakı və rolu olmuş ziyalı nəslin İstanbulda yaşamış və dəfn edilmiş üzvlərinin bir qisminə həsr olunmuşdur.

Azərbaycanın İstanbuldakı baş konsulluğu tərəfindən təşkil olunan tədbirdə çıxış edən baş konsul Nərminə Mustafayeva, Azərbaycanın Bosniya və Herseqovinadakı səfiri Vilayət Quliyev, Azərbaycan Yazıçılar Birliyinin sədri, Xalq yazıçısı Anar, Türkiyə Böyük Millət Məclisinin (TBMM) Türkiyə-Azərbaycan parlamentlərarası dostluq qrupunun rəhbəri millət vəkili Şamil Ayrım, Türkiyə Mərmərə Universitetinin professoru Mehdi Gəncəli, Fətəli xan Xoyskinin qardaşı nəvəsi Kərim Mehmedzadə, professor İbrahim Yıldırım və digərləri 1918-ci ildən sonra Azərbaycanı tərk etmək məcburiyyəti qarşısında qalan azərbaycanlıların ağır həyat yolu haqqında danışıblar.

Kitabda İstanbulda dəfn edilmiş azərbaycanlılarla bağlı nadir fotoşəkillər və sənədlərə yer verilmişdir. Tədbir Azərbaycan Respublikasının Türkiyədəki səfirliyinin nəzdindəki Azərbaycan Mədəniyyət Mərkəzinin solisti Vüsalə Əsgərovanın ifasında təqdim edilən musiqi proqramı ilə tamamlanmışdır.