2024-cü il oktyabrın 15-19-da Türkiyənin İzmir şəhərindəki Ege Universitetində Azərbaycan milli mətbuatının banisi Həsən bəy Zərdabinin xatirəsinə həsr edilmiş Türk Dünyasında Mətbuat Simpoziumunun təşkilatçıları sırasında Xəzər Universiteti Azərbaycandan yeganə ali təhsil müəssisəsi olaraq yer alıb.
Simpoziuma Türkiyədən 60 və 17 ölkədən 110 alim qatılıb. Xəzər Universitetini Tarix və arxeologiya departamentinin müəllimi, tarix üzrə fəlsəfə doktoru Hacı Nərimanoğlu təmsil edib. O, əvvəlcə Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlının salamlarını simpozium iştirakçılarına və Ege Universitetinin rəhbərliyinə çatdırıb, sonra türk dövlətlərinin ortaq dil və əlifbası ideyasının tarixinə həsr olunmuş məruzə ilə çıxış edib. Maraqla qarşılanan məruzə ətrafında geniş müzakirə aparılıb. İştirakçılara sertifikatl təqdim olunub.
Simpozimun açılış günü Azərbaycanın Türkiyədəki səfirliyinin nəzdindəki Mədəniyyət Mərkəzi Ege Universiteti Ədəbiyyat fakültəsi kollektivinin dəstəyi ilə İzmir Mədəniyyət Mərkəzində Azərbaycan sənətçilərinin möhtəşəm konsertini, Qarabağa, Şuşaya, Zəfər gününə, milli geyimlərimizə həsr olunmuş sərgilər təşkil edib.