2024-cü il oktyabrın 11-də Xəzər Universiteti Elmi Şurasının növbəti iclası keçirildi. İclası Xəzər Universitetin rektoru, Elmi Şuranın sədri Dos. İradə Xəlilova açaraq, gündəlikdəki məsələləri Elmi Şura üzvlərinin nəzərinə çatdırdı.

Sədr gündəliyin birinci məsələsi olan Xəzər Universitetinin Elmi Şurasının yeni tərkibi haqqında məlumat verdi. O qeyd etdi ki, Elmi Şuranın tərkibinə Xəzər Universitetindəki vəzifələrinə görə və fakültələrin təqdimatlarına əsasən cəmi yeddi nəfər yeni üzv daxil edilmişdir. Xəzər Universitetində fəaliyyətini dayandıran əməkdaşlar isə Elmi Şura üzvlüyündən çıxarılmışdır.

Gündəliyin 2-ci məsələsi olan məzunlar haqqında məlumatları Təbiət elmləri və mühəndislik fakültəsinin dekanı Fəxrəndə Əfəndiyeva, İqtisadiyyat və menecment fakültəsinin dekan vəzifəsini icra edən Xanım Öməroğlu, Humanitar, təhsil və sosial elmlər fakültəsinin dekan vəzifəsini icra edən Aygün Verdiyeva və İqtisadiyyat və biznes yüksək təhsil fakültəsinin dekanı İnqilab Əhmədov təqdim etdilər. Universitetin məzun olan bakalavriatura və magistratura tələbələrinin qiymətləri, ixtisasları və s. haqqında ətraflı məlumat dinlənildi və müzakirələr aparıldı.

Gündəliyin üçüncü məsələsi - 2024-2025-ci tədris ilində Xəzər Universitetinə qəbul haqqında rektor İradə Xəlilova məlumat verərək qeyd etdi ki, cari ildə hər üç təhsil səviyyəsi üzrə qəbulda keçən ilə nisbətən artım müşahidə olunmuşdur.  

Gündəliyin dördüncü məsələsi olan Elmi Şuranın illik fəaliyyət planı haqqında rektor İradə Xəlilova məlumat verərək, 2024-2025-ci tədris ili ərzində müzakirəsi planlaşdırılan məsələləri Elmi Şura üzvlərinin nəzərinə çatdırdı.

Elmi Şuranın katibi Günel Bahəddinova gündəliyin beçinci məsələsi olan Azərbaycan Respublikası Nazirlər Kabinetinin yeni qərarlarına əsasən Xəzər Universitetinin doktorantura əsasnaməsində edilən dəyişikliklər barədə və  gündəliyin altıncı məsələsi olan dissertantın elmi rəhbərinin dəyişdirilməsi ilə bağlı məlumat verdi. Məsələlər Elmi Şura üzvləri tərəfindən müzakirə olundu və təkliflər irəli sürüldü.

Gündəliyin yeddinci məsələsi - Akkreditasiya Komissiyasının yekun hesabatında göstərilən tövsiyə və göstərişlərin icrasının təmin edilməsi məqsədilə Xəzər Universitetinin 2023/24 - 2027/28-ci tədris illəri üzrə fəaliyyət planı haqqında Keyfiyyətin Təminatı Mərkəzinin müdiri Lyudmila Sotova ətraflı məlumat verdi. Beşillik fəaliyyət planında qeyd olunan bütün məlumatlar Elmi Şura üzvləri tərəfindən müzakirə olunaraq, fəaliyyət planı təsdiq olundu.

 Sədr gündəliyin səkkizinci məsələsi olan  departamentlərin illik fəaliyyətlərinin hesabatı haqqında məlumat vermək üçün departament rəhbərlərinə söz verdi. Riyaziyyat departamentinin müdiri Əli Hüseyinli, Dillər və ədəbiyyatlar departamentinin müdiri Dilbər Zeynalova və Memarlıq və dizayn  departamentinin müdiri Şəhla Abbasova 2023-2024-cü tədris ilində departamentlərin fəaliyyəti haqqında ətraflı məlumat verdilər. Məsələ Elmi Şura üzvləri tərəfindən müzakirə olundu və hesabatlar qəbul olundu.

Elmi şuranın gündəliyindəki bütün məsələlər müzakirə olunaraq, müvafiq qərarlar qəbul  edildi.