Xəzər Universitetinin İdarəetmə və tələbə işləri üzrə prorektoru, Dillər və Ədəbiyyatlar departamentinin professoru İsaxan İsaxanlı 2024-cü il oktyabrın 3-də Nizami Gəncəvi adına Milli Ədəbiyyat Muzeyində böyük rus şairi Serqey Yeseninin anadan olmasınının 129 illiyinə həsr edilmiş “Serqey Yeseninin dünənki, bugünkü və gələcək dostları” adlı tədbirdə iştirak etdi.

Ədəbiyyat Muzeyinin direktoru, akademik Rafael Hüseynov öz çıxışında İsaxan İsaxanlının Yesenin araşdırmaları ilə bağlı ətraflı məlumat verdi, onun bu sahədə fəaliyyətini yüksək qiymətləndirdi. Tədbirdə İsaxan İsaxanlı  “Serqey Yeseninin həyat və yaradıcılığında Bakı dövrünün yeri və rolu” mövzusunda məruzə etdi. Yeseninin Bakı dövrünə aid maraqlı və nadir şəkillərlə müşayiət edilən məruzə maraqla qarşılandı.

Sonda ədəbi hissə başladı, konsert proqramı baş tutdu. Proqramda məktəblilər Yeseninin şeirlərini söylədilər, Azərbaycan dilinə tərcümələrini oxudular. Oxunan tərcümələr arasında İsaxan İsaxanlının Yeseninin “Anama məktub” şeirinin tərcüməsi də vardı; şeir Xəzər rayonunun məktəblilərinin ifasında səsləndi.