2024-cü il oktyabrın 2-də Xəzər Universiteti və ABŞ-ın Azərbaycandakı səfirliyinin birgə təşkilatçılığı ilə Fulbrayt təqaüdçüsü, Virciniya Texnologiya Universitetinin dosenti  Dr.Julie Shortridge tərəfindən iqlim dəyişikliyi və dayanıqlılığı mövzusunda seminar keçirilmişdir. Seminar COP29 tədbirləri çərçivəsində baş tutmuş və tələbələr tərəfindən böyük maraqla qarşılanmışdır.

Dr. Julie Shortridge öz məruzəsində transformativ uyğunlaşmanın əhəmiyyəti, iqlim dəyişikliyinin yaratdığı problemlərin öhdəsindən gəlmək üçün yeni texnologiyaların və uzunmüddətli həll yollarının inkişaf etdirilməsinin zəruriliyindən danışmışdır. Həmçinin, iqlim dəyişikliyinə uyğunlaşma mövzusunda ictimai maarifləndirmənin artırılmasının və bu sahədə təhsilin əhəmiyyətini də vurğulamışdır. Natiq onu da qeyd etmişdir ki, STEM (Elm, Texnologiya, Mühəndislik və Riyaziyyat) sahələrində müxtəlifliyin artması, xüsusilə iqlim dəyişikliyi kimi mürəkkəb problemlərin həllində olduqca vacibdir. Fərqli təcrübələrin və ideyaların bir araya gəlməsi ilə daha müasir və səmərəli həll yolları inkişaf etdirilə bilər.

Seminarın sonunda Dr. Shortridge professor-müəllim heyətinin və tələbələrin müxtəlif suallarını cavablandırmışdır. Sonra, Xəzər Universitetinin rəhbərliyi ABŞ səfirliyinə və Dr. Julie Shortridge`yə əhəmiyyətli elmi müzakirələrə görə təşəkkür bildirmişdir.