2024-cü il oktyabrın 4-də Xəzər Universitetinin Beynəlxalq əlaqələr şöbəsi universitetə yeni qəbul olunmuş əcnəbi tələbələr üçün oriyentasiya günü keçirdi. Tədbir zamanı yeni tələbələr qayda və prosedurlar barədə məlumat, habelə, Azərbaycanda yaşamaq üçün faydalı tövsiyələr əldə etdilər.

Xəzər Universitetinin rektoru Dos. İradə Xəlilova və Beynəlxalq əlaqələr şöbəsinin müdiri Fatimə Vəliyevanın tələbələri salamlaması və onlara universitet həyatında uğurlar arzulaması ilə başlanan tədbirdə İqtisadiyyat və biznes yüksək təhsil fakültəsinin dekanı İnqilab Əhmədov, Təbiət elmləri, sənət və texnologiya yüksək təhsil fakültəsinin dekan vəzifəsini icra edən Günel Bahəddinova, Təbiət elmləri və mühəndislik fakültəsinin Tələbə işləri üzrə dekan müavini Vəfa Aslanova, İqtisadiyyat və menecment fakültəsinin dekan vəzifəsini icra edən Xanım Nəbiyeva,  Humanitar, təhsil və sosial elmlər fakültəsinin dekan vəzifəsini icra edən Aygün Verdiyeva əcnəbi tələbələrə tədris prosesinə aid zəruri məlumatlar verdilər. Sonra yeni tələbələr auditoriya qarşısında özlərini təqdim etdilər və bir-birləri ilə tanış oldular.

Beynəlxalq əlaqələr şöbəsinin müdiri Fatimə Vəliyeva tərəfindən tələbələrə Xəzər Universiteti haqqında təqdimat nümayiş etdirildi, şöbənin koordinatoru İlqarə Abdullayeva tələbələri Azərbaycan və mədəniyyəti, əlavə olaraq miqrasiya məsələləri haqqında məlumatlandırdı. Xəzər Universitetində Erasmus Student Network Avropa layihəsinin Təşəbbüskar Komandası (Khazar ESN Initiative Group) - Əcnəbi Tələbələr Klubunun prezidenti Alisa Nazirzadə, vitse-prezidenti  Aduagba Yahaya Abdullahi tələbələrə Erasmus proqramı, Debat, KuTalks, Musiqi, İqtisadiyyat klubları isə öz klubları barəsində  ətraflı məlumat verdilər.

Universitetdə artıq təhsil alan əcnəbi tələbələr də öz təcrübələrini, Azərbaycan haqqında biliklərini yeni tələbələrlə bölüşdülər.