Xəzər Universitetinin Riyaziyyat və Onun Tətbiqləri Elmi-Tədqiqat Mərkəzinin üzvü Namiq Quliyev Stenford Universiteti və Elsevier şirkəti tərəfindən hazırlanmış dünyanın ən nüfuzlu tədqiqatçılarının 2024-cü il üçün siyahısında yer almışdır. Bu siyahının hazırlanması məqsədilə öz-özünə istinadlar, həmmüəlliflərin sayı və digər parametrlər nəzərə alınmaqla, Scopus elmi bazasında hər bir alimə olan istinadlar əsasında onun kompozit istinad xalı (c-score) hesablanır və hər bir elm sahəsi üzrə ən yüksək 2% göstəriciyə malik olanlar seçilir.

Namiq Quliyev bu il Azərbaycandan riyaziyyat sahəsində həmin siyahıya düşmüş iki alimdən biridir. Onun əsas tədqiqat sahəsi diferensial operatorların spektral nəzəriyyəsidir. Namiq Quliyevin 2019-cu ildə "Journal of Mathematical Physics" jurnalında dərc olunmuş məqaləsi redaksiya heyəti tərəfindən ən yaxşı məqalələrdən biri hesab olunaraq, "Featured Article" seçilmişdir, 2023-cü ildə Oksford Universiteti tərəfindən çap olunan "The Quarterly Journal of Mathematics" jurnalındakı məqaləsi isə hal-hazırda həmin jurnalın son iki ildə çap olunmuş ən nüfuzlu məqalələrinin siyahısına başçılıq edir. Onun elmi əsərləri, həmçinin, "Annali di Matematica Pura ed Applicata", "Canadian Mathematical Bulletin", "Inverse Problems" və "Proceedings of the American Mathematical Society" kimi məşhur jurnallarda çap olunmuşdur. Riyaziyyat və onun tətbiqləri elmi-tədqiqat mərkəzinin direktoru Vüqar İsmayılovla birgə neyron şəbəkələr sahəsində məqalələri isə həmin sahənin ən nüfuzlu jurnalları arasında yer alan "Neural Computation", "Neural Networks" və "Neurocomputing" jurnallarında dərc edilmişdir.

Qeyd edək ki, Namiq Quliyev Azərbaycan Respublikası Elm və Təhsil Nazirliyinin Riyaziyyat və Mexanika İnstitutunun aparıcı elmi işçisi vəzifəsində çalışır.

Link: https://elsevier.digitalcommonsdata.com/datasets/btchxktzyw/7