Humanitar, təhsil və sosial elmlər fakültəsinin Tarix müəllimliyi ixtisasında təhsil alan I kurs tələbələri tədris ilinin ilk dərslərinə Tarix və arxeologiya departamentinin müəlllimi Orxan Zamanovun təşkilatçılığı ilə AMEA Arxeologiya və Antropologiya İnstitutunun “Muzey-Sərgi” zalında başladılar və həmin institutun “Elmi Fond və Ekspozisiya” müdiri Dr. Ceyhun Eminlinin dəstəyi ilə arxeoloji eksponatlar və tapıntılar ilə bilavasitə tanışlıq çərçivəsində ilk arxeoloji ekskursiyaları baş tutdu.

Sentyabrın 26-sı və oktyabrın 1-də keçirilən ekskurs-dərslər zamanı fənn müəllimi Orxan Zamanov tələbələrə Azərbaycanın nümunəsində dünyanın maddi-mədəni irsinin arxeoloji cəhətdən öyrənilməsi və muzey-sərgi zalında saxlanılan arxeoloji nümunələr haqqında tədris materialı ilə əlaqəli və əhatəli məlumat vermişdir. Həmçinin, tələbələrlə arxeoloji nümunələr əsasında fikir mübadiləsi, onların öyrənilmə üsulları və dünyada yeri haqqında müzakirələr aparılmışdır. 

AMEA Arxeologiya və Antropologiya İnstitutunun “Muzey-Sərgi” zalı və ekspozisiyadakı arxeoloji materiallarla tanışlıq tələbələrdə ciddi təəssürat yaradaraq, onların dərsə olan marağını hiss olunacaq dərəcədə artırmışdır. Qeyd etmək lazımdır ki, bu tərz ekskurs-dərslər tələbələrin əldə etdikləri nəzəri biliklərin möhkəmləndirilməsinə xidmət edir və bu ənənəvi olaraq  təşkil olunur.