2024-cü il sentyabrın 25-də Xəzər Universitetinin “Neftçilər” kampusunda Nailəxanım Mədəniyyət Mərkəzində Fulbrayt tədqiqatçısı Dr. Natalia Rekhter və English Language Fellow proqramının təqaüdçüsü Michael universitet heyətinə təqdim olundular.

Dr. Natalia Rekhter`in proqram çərçivəsində İqtisadiyyat və biznes yüksək təhsil fakültəsində Səhiyyə iqtisadiyyatı və Səhiyyə idarəetməsi fənlərindən mühazirə oxuması, Michael Collins`in isə ingilis dili müəllimlərinin dərslərində müşahidələr apararaq, tələbələrin dil öyrənmə bacarıqlarının inkişaf etdirilməsi üçün təlimlər keçirməsi nəzərdə tutulur.

Xəzər Universitetinin rektoru Dos. İradə Xəlilova və ABŞ-ın Azərbaycandakı səfirliyinin İctimaiyyətlə əlaqələr şöbəsinin rəhbəri  Bill Murad qısa nitq söylədilər. Sonra qonaq tədqiqatçılar öz təəssüratlarını bölüşdülər.

Görüşdə Xəzər Universitetinin fakültə dekanları, departament müdirləri və əməkdaşlar, ABŞ-ın Azərbaycandakı səfirliyinin əməkdaşları – İngilis dili üzrə Proqram koordinatoru Səbinə Abdullayeva və Təhsil üzrə mütəxəssis Xanim Teilova da iştirak edirdilər.

Tədbirdə Xəzər Universiteti Kamera orkestrinin (bədii rəhbər universitetin Musiqi və incəsənət departamentinin müdiri, əməkdar müəllim, pianoçu Zülfiyyə Sadıqova və orkestrin dirijoru Meri Çeminava) konserti təqdim olundu. Qonaqlar üçün çay süfrəsi açıldı.Tədbirin sonunda rektor İradə Xəlilova qonaq tədqiqatçılara hədiyyələr təqdim etdi.

Qeyd edək ki, hər iki proqram ABŞ Dövlət Departamenti tərəfindən maliyyələşdirilir. Onu da qeyd edək ki, “English Language Fellow” İngilis dili təqaüdü proqramı ingilis dilinin digər dildə danışan insanlara tədrisi və ya ingilis dilinin xarici dil kimi tədrisi sahələrində yüksək ixtisaslaşmış ABŞ tədrisçilərinin dünyanın müxtəlif hissələrinin tədris qurumlarında 10 aylıq müddəti əhatə edən fəaliyyəti üçün nəzərdə tutulmuş təqaüd proqramıdır.