2024-cü il sentyabrın 11-12-də Xəzər Universitetinin  nümayəndə heyəti Belçikanın Gent şəhərində KU Leuven Universitetində olub. Nümayəndə heyətinə Keyfiyyətin Təminatı Mərkəzinin direktoru Lyudmila Sotova, Fizika və elektronika departamentinin müdiri Fəridə Tatardar və İnkişaf Mərkəzinin layihə meneceri Salimə Əhmədova daxil idi. Bu səfər Erasmus+ CBHE layihəsi çərçivəsində həyata keçirilən “Azərbaycan, Gürcüstan və Ukrayna ilə Tərəfdaşlığın Qarşılıqlı Gücləndirilməsi istiqamətində Avropa Enerji Effektivliyi - 3E-Tərəfdaşlıq” layihəsinin bir hissəsi idi.

Gündəliyə elektrik mühəndisliyi üzrə tədris planını zənginləşdirməyə yönəlmiş bir sıra faydalı fəaliyyətlər daxil idi və bu fəaliyyətlərdə enerji səmərəliliyinə xüsusi diqqət yetirildi. İştirakçılar elektrik mühəndisliyi sahəsində enerji səmərəliliyi üzrə müasir meyillər haqqında müzakirələr apardılar və öz proqramlarına tətbiq edə biləcəkləri ən yaxşı təcrübələri araşdırdılar.

Tədris planının hazırlanması sessiyaları, laboratoriyalar ilə tanışlıq, bərpa oluna  bilən enerji haqqında məlumat və TRANSfarm layihəsi ilə tanışlıq səfərin əsas məqamları idi.

Səfər zamanı tədris planı islahatları təşəbbüslərinə töhfə verəcək dəyərli məlumatlar əldə olunması ilə yanaşı, Xəzər Universiteti ilə KU Leuven arasında əlaqələrin gücləndirilməsi üçün də şərait yarandı.