Tatarıstan Respublikası Dövlət Şurasının deputatı, Tatarıstan Yazıçılar Birliyinin sədri, Xalq şairi Rkail Zəydulla və Beynəlxalq “Alaş” Ədəbiyyat mükafatı laureatı, Dünya Gənc Türk Yazarlar Birliyi (DGTYB) Məsləhət Şurasının sədri Əkbər Qoşalının layihə rəhbəri olduğu antologiya Tatarıstan Yazıçılar Birliyinin “Ədəbi birgəlik” seriyasından çap olunub.

Kazandakı məşhur “Yazıçı” nəşriyyatında nəfis şəkildə işıq üzü görən antologiyanın tərtibçisi Tatarıstan Yazıçılar Birliyinin başqan müavini İlsiyar Qaripova, məsləhətçisi Tatarıstanda yaşayan tanınmış azərbaycanlı vəkil İsmət Orucəliyev, rəyçiləri Azərbaycan Yazıçılar Birliyinin katibi Səlim Babullaoğlu, DGTYB başqanı İntiqam Yaşar, “Çukurova Ədəbiyyatçılar Dərnəyi” İctimai Birliyinin fəxri başqanı İlqar Türkoğludur. 

Tatar türkcəsində işıq üzü görən “Çağdaş Azərbaycan hekayəsi” antologiyasında çap olunan mətnlər arasında Dillər və ədəbiyyatlar departamentinin müəllimi Yeqzar Cəfərlinin müəllifi olduğu “Cənab K” adlı hekayəsi də var.

Antologiyanın Azərbaycanda və Tatarıstanda təqdimatı nəzərdə tutulur.