2024-cü il iyulun 30-da AZƏRTAC Dövlət İnformasiya Agentliyi 2024-cü il üçün Azərbaycan Respublikasının texnika sahəsi üzrə “Xüsusi təyinatlı sürtkü yağlarının yaradılması və istehsalının təşkili” kompleks elmi-texniki işinə görə Azərbaycan Respublikasının Dövlət Mükafatına layiq görülmüş Aşqarlar Kimyası İnstitutunun direktoru akademik Vaqif Fərzəliyevlə (institutun professorları Həqiqət Cavadova və Əfsun Sucayevlə birlikdə) “Dünya elminə tam inteqrasiya etməsək də, bu istiqamətdə bir çox nailiyyətlər əldə olunub” başlığı ilə geniş müsahibə dərc etmişdir (müəllif Sevda Cəfərova).

Müsahibədə akademik başçılıq etdiyi institutun son illərdəki fəaliyyətindən ətraflı bəhs edərək, bu qənaətə gəlir ki, Azərbaycan elmi göstəricilərinə görə Cənubi Qafqazda liderdir. O, eyni zamanda, istedadlı şagird və tələbələrin elmə cəlb olunması üçün məqsədyönlü tədbirlər həyata keçirdiklərini də vurğulayıb. Buna misal olaraq qeyd edib ki, Xəzər Universitetinin “Dünya” məktəbinin X sinif şagirdləri Səid Aslanov və İbrahim Allahverdiyev institutun Fizioloji fəal üzvi birləşmələr laboratoriyasında institutun icraçı direktoru professor Əfsun Sucayevin elmi rəhbərliyi ilə “Altsheymer xəstəliyinə qarşı yeni nəsil enzim-izoenzim inhbitorların yaradılması” mövzusunda apardıqları tədqiqat işinə görə  bu ilin may ayında Kaliforniya şəhərində keçirilən Beynəlxalq Elm və Mühəndislik Yarışmasında (ISEF) “Biotibb və sağlamlıq elmləri” kateqoriyası üzrə bürünc medala layiq görülüblər.

https://azertag.az