Xəzər Universitetinin nümayəndə heyəti – universitetin təsisçisi,   Direktorlar və Qəyyumlar Şurasının sədri Prof. Akad. Hamlet İsaxanlı, Təbiət elmləri və mühəndislik fakültəsinin dekanı Dr. Fəxrəndə Əfəndiyeva və Fizika və elektronika departamentinin müdiri Dr. Fəridə Tatardar 2024-cü il avqustun 25-30-da  İran İslam Respublikasının Təbriz şəhərində səfərdə olmuşdur.

Nümayəndə heyəti avqustun 27-də Azərbaycan Mədəni Şəhid Universitetində keçirilən “Kimya və Ətraf Mühit – 2024” adlı XI Beynəlxalq Konfransın açılışında iştirak etmiş və Xəzər Universiteti, Azərbaycan Şəhid Mədəni Universiteti və Türkiyənin Erciyes Universiteti arasında elm və təhsil sahəsində birgə əməkdaşlığın inkişaf etdirilməsi məqsədilə üçtərəfli anlaşma memorandumu imzalanmışdır.

Konfransın açılışında Azərbaycan Şəhid Mədəni Universitetinin rektoru Dr. Mohammad Sadiq Azər bu anlaşmanın üç ölkə arasında elm və təhsil əlaqələrinin gücləndirilməsi istiqamətində mühüm bir addım olacağını, müəllim və tələbə mübadiləsinin, elmi-tədqiqat işlərinin aparılmasının, birgə elmi konfransların keçirilməsinin bu anlaşmanın maraqlarına uyğun olduğunu qeyd etmişdir.

Konfransın açılış mərasimində Xəzər Universitetinin Direktorlar və Qəyyumlar Şurasının sədri Prof.Akad. Hamlet İsaxanlı və Türkiyənin Erciyes Universitetinin rektoru Prof.Dr. Fatih Altun da çıxış etmişlər. Konfrans üç gün davam etmiş, məruzələr dinlənilmişdir.

Səfər zamanı, həmçinin, Xəzər Universiteti ilə Təbriz Tibb Elmləri Universiteti arasında da anlaşma memorandumu imzalanmış, nümayəndə heyəti universitetin elmi-tədqiqat mərkəzlərində olmuş və müzakirələr aparılmışdır.