Xəzər Universitetində Erasmus Student Network Avropa layihəsinin Təşəbbüskar Komandası (Khazar ESN Initiative Group) - Əcnəbi Tələbələr Klubu tərəfindən 2023-cü ilin dekabr ayında universitetin Beynəlxalq tələbələr şöbəsinin nəzdində təsis edilmiş Fransız dili kursu başa çatmışdır.

Kurs davam etdiyi müddətdə tələbələrin imtahan və tətil səbəblərinə görə fasilə olmuş, aprel ayının əvvəlindən iyun ayının sonuna qədər isə 3 aylıq proqram yerinə yetirilmişdir.

Kursun fasiləyə qədərki hissəsində dərs proqramını universitetin əcnəbi tələbəsi Niama Hamdani, fasilədən sonrakı hissəsində isə universitetə dəvət olunmuş, İsveçrədə təhsil almış Aydan Eyvazzadə tədris etmişdir.

Kurs universitetin öz tələbələri ilə yanaşı İqtisad universitetinin də tələbələrinin diqqətini cəlb etmişdir.

Bütün dərs prosesi müddətində gedişatı Əcnəbi Tələbələr Klubunun prezidenti Alisa Nazirzadə və müxtəlif aralıqlarla klubun tədbir koordinatoru İlahə Məmmədova və sosial media meneceri Nigar Əsgərova nəzarətdə saxlamışlar.

Klub prezidenti bütün bu müddət boyunca kursda həm də tələbə kimi iştirak etmişdir.

Kurs başa çatdıqdan sonra tədrisçi müəllimlərə, dərsdə ən yüksək davamiyyətə sahib tələbələrə və  kursun təşkilatçılıq və idarəsi ilə məşğul olduğuna, həm də tələbə kimi kursu bitirdiyinə görə klub prezidentinə Xəzər Universiteti Beynəlxalq tələbələr şöbəsi tərəfindən sertifikatlar təqdim olunmuşdur.