Xəzər Universitetinin Nailəxanım Fondunun təsis etdiyi təqaüdün ilk məzunu kimi Brilliant Windy Khairunnisa`nı ürəkdən təbrik edirik O, eksklüziv müsahibəsində öz ruhlandırıcı həyat hekayəsini, motivasiyalarını və gələcək planlarını bölüşüb.

• Nailəxanım təqaüdünə müraciət etməyə sizi nə həvəsləndirdi?

• Mən çətin bir mühitdə doğulmuşam, xüsusilə anama görə. O, hər dəfə dünyaya uşaq gətirəndə ətrafındakılar onu təhqir edirdi, çünki beş övladının beşi də qız idi. Buna görə mənə həmişə tövsiyələr verilirdi ki, qız olsam da, təhsilə davam etməli, biliklərimi genişləndirməli, dözümlü olmalı və hər şeyə nail olmaq üçün səy göstərməliyəm. Nailəxanım təqaüdü haqqında məlumat aldıqda, bu təqaüdün yalnız qızlar üçün olması da məni çox ruhlandırdı. Bu səbəbdən, sənədlərimi  hazırladım, bacardığım ən  yaxşı essemi yazdım və təqdim etdim, çünki qadınlar üçün olan bir təqaüdün qadınları gücləndirmək üçün bir cəhd olduğunu düşündüm.

• Nailəxanım təqaüdünün ilk məzunu olmaq sizin üçün nə deməkdir?

• Dərin minnətdaram - Əlhəmdulillah, həmd olsun Allaha. Bu uğuru gözləmirdim. Özümü rahat hiss edirəm, çünki geniş biliyə sahib olmağın, mümkün olan yüksək səviyyəyə çatmağın və ya başqalarına töhfə vermənin cinslə bağlı olmadığını özümə sübut edə bildim; bu, insanın qətiyyəti, əzmkarlığı və daxili arzularını alovlandırmağı ilə bağlıdır. Bu səbəbdən, Nailəxanım təqaüdünün ilk məzunu olmaq - başqalarına nümunə olmaq deməkdir. Bu çətin ola bilər, amma ümid edirəm ki, başqalarını da öz  məhdudiyyətlərini aşmağa ruhlandıracağam

• Siz artıq məzun oldunuz. Gələcək planlarınız nədir? Qazandığınız bilik və təcrübədən necə istifadə etməyi düşünürsünüz?

• Həyatın kitab kimi olduğuna inanıram - növbəti fəsilə keçmək üçün səhifəni çevirməliyik. Məzun olduqdan sonra ölkəmə qayıtmağı, valideynlərimlə görüşməyi və şəxsən onlardan xeyir-dua istəməyi planlaşdırıram. Tədqiqatlarımın nəticələri dərc ediləcək və ümid edirəm ki, həmkarlarım, xüsusən də mənim ixtisasım üzrə olanlar üçün faydalı olacaq. İnanıram ki, ən yaxşı insanlar digər insanların həyatına töhfə verənlərdir.

• Gələcək müraciət edənlərə hansı məsləhətləri verə bilərsiniz?

• Nailəxanım təqaüdçüsü olmaq qadınlar üçün bir nümunə və onlarln güclənməsinin tərəfdarı olmaq deməkdir. Buna görə də, bu inanılmaz fürsəti əldən verməyin. Bir kişiyə təhsil vermək yalnız bir insanın həyatına təsir edə bilər, amma bir qadına təhsil vermək bütün bir nəslə təsir edə və təhsil verə bilər.

  Söhbət etdi: Arzu Bədəlova