2024-cü il iyulun 5-də  Xəzər Universiteti Elmi Şurasının növbəti iclası keçirildi.

İclası universitetin rektoru Dos. İradə Xəlilova açaraq, gündəlikdəki məsələləri Elmi Şura üzvlərinin nəzərinə çatdırdı.

Gündəliyin 1-ci məsələsi olan məzunlar haqqında məlumatları Təbiət elmləri və mühəndislik fakültəsinin dekanı Fəxrəndə Əlimərdanova, İqtisadiyyat və menecment fakültəsinin dekanı Ceyhun Məmmədov, Humanitar, təhsil və sosial elmlər fakültəsinin dekan müavini Aygün Verdiyeva, Təbiət elmləri, sənət və texnologiya yüksək təhsil fakültəsinin dekanı Səidə Şərifova və İqtisadiyyat və biznes yüksək təhsil fakültəsinin dekanı İnqilab Əhmədov təqdim etdilər. Universitetin məzun olan bakalavriatura və magistratura tələbələri, onların qiymətləri, ixtisasları və s. haqqında ətraflı məlumat dinlənildi və müzakirələr aparıldı.

Gündəliyin ikinci məsələsi olan fəlsəfə doktorluğu proqramı üzrə hazırlanan qəbul imtahanlarının proqramları haqqında Elmi Şuranın katibi Günel Bahəddinova məlumat verdi. O qeyd etdi ki, 2024-cü ildə fəlsəfə doktorluğu proqramı üzrə  Beynəlxalq münasibətlər,            Dünya iqtisadiyyatı, Genetika, German dilləri, Kompüter elmləri, Neft və qaz yataqlarının işlənməsi və istismarı, Ümumi pedaqogika, pedaqogikanın və təhsilin tarixi, həmçinin Ümumi psixologiya üzrə qəbul imtahanları keçiriləcək. Uyğun departamentlər tərəfindən hər bir ixtisas üzrə qəbul proqramları hazırlanmış, proqramlara müsbət olmaqla daxili və xarici rəylər verilmişdir. Elmi Şura üzvləri proqramlarla tanış olaraq, onları təsdiq etdilər.

Sonra sədr gündəliyin üçüncü məsələsi olan  departamentlərin illik fəaliyyətlərinin hesabatı haqqında məlumat vermək üçün departament rəhbərlərinə söz verdi. İqtisadiyyat və menecment departamentinin müdiri Ceyhun Məmmədov, İngilis dili və ədəbiyyatı departamentinin müdiri Milana Abbasova, Fizika və elektronika departamentinin müdiri Fəridə Tatardar, Həyat elmləri departamentinin müdiri Cəmalə Eldarova, Siyasi elmlər və fəlsəfə departamentinin müdiri Orxan Vəliyev 2023-2024-cü tədris ilində departamentin fəaliyyəti haqqında ətraflı məlumat verdilər. Məsələ Elmi Şura üzvləri tərəfindən müzakirə edildi və hesabatlar təsdiq olundu.

İclasın sonunda sədr növbəti Elmi Şurada digər departamentlərin illik fəaliyyət hesabatlarının dinləniləcəyini qeyd etdi.