2024-cü il iyunun 27-28-də Bakıda Ekologiya və Təbii Sərvətlər Nazirliyi və “Təmiz şəhər” ASC-nin təşkilatçılığı ilə “Yaşıl dünya naminə həmrəylik: dayanıqlı gələcək üçün tullantıdan dəyərə” mövzusunda beynəlxalq forum keçirilib. Bu il Azərbaycan dğvləti Birləşmiş Millətlər Təşkilatının Dayanıqlı İnkişaf Məqsədlərinə, xüsusən Məqsəd 11 (Dayanıqlı Şəhərlər və İcmalar) və Məqsəd 12 (Məsuliyyətli İstehlak və İstehsal) ilə uyğunlaşan qlobal ekoloji əməkdaşlığa və davamlılığa sadiqliyini nümayiş etdirərək, ölkədə “Yaşıl dünya naminə həmrəylik ili” elan etmişdir.)
Tədbirdə Ekologiya və Təbii Sərvətlər Nazirliyinin rəsmiləri, BMT, ali təhsil müəssisələri, müxtəlif beynəlxalq təşkilatlar və xarici ölkələrdən nümayəndələr iştirak ediblər. Xəzər Universiteti forumda rektor Dos. İradə Xəlilova ilə təmsil olunub.
İki gün davam edən forum iştirakçı təşkilatlar və şirkətlər tərəfindən “Sıfır Tullantı” Bakı Təşəbbüsünün qəbul edilməsi ilə yekunlaşıb. Təşəbbüs davamlı tullantıların idarə olunması təcrübələrini, innovativ qablaşdırma həllərini, təkrar emalın təşviqi və tullantıların azaldılması strategiyalarını əhatə edir.
Forum çərçivəsində Beynəlxalq Forum salonunun girişində tullantı materiallarından hazırlanmış müxtəlif əl işləri və rəsm əsərlərindən ibarət sərgi nümayiş etdirilib.