2024-cü il mayın 12-17-də Xəzər Universitetinin tələbəsi, “Əbədi Birlik” Gənclər İctimai Birliyinin sədri Şahin Əliyev Şimali Kipr Türk Cümhuriyyəti (ŞKTC) Məclisinin sədri Zorlu Töre`nin özəl qonağı olaraq, ölkəyə səfər edib. O, səfər zamanı rəsmi dəvətlə Azərbaycan-ŞKTC və Türkiyə-ŞKTC parlamentlərarası əlaqələr üzrə işçi qrupları nümayəndə heyətlərinin iştirakı ilə keçirilən iclaslara və tədbirlərə də qatılıb.
Şahin Əliyev “Əbədi Birlik” Gənclər İctimai Birliyinin Şimali Kipr nümayəndəliyinin rəhbəri Serdar Şengül’lə birlikdə ilk olaraq Cümhuriyyət Məclisinin sədri Zorlu Töre ilə görüşərək, ona rəhbərlik etdiyi ictimai birliyin “Şərəfli Xidmət” və şəxsi katibi İrem Uygun`a “Xidmət” mükafatını və müəllifi olduğu “İlhamlı Zəfər - 20”, həmçinin “Kıbrıs - Şərqi Aralıq Dənizində Türklərin Əbədi Qalası” kitablarını təqdim edib. Cümhuriyyət Məclisinin sədri Zorlu Töre də öz növbəsində Şahin Əliyevə Cümhuriyyət Məclisinə məxsus hədiyyələr təqdim edib.
Digər görüş Türkiyə Respublikası Gənclər və idman koordinatoru Mithat Tekçam və Şimali Kiprin AK Parti nümayəndəliyinin sədr müavini Metin Yılgın ilə baş tutub. Görüş zamanı Azərbaycan-Türkiyə-Şimali Kipr gənclərinin mübadilə proqramlarının və birgə layihələrin icrası ilə bağlı fikir mübadiləsi aparılıb.
Mayın 13-də Azərbaycandan olan heyət 1964-cü ilin dekabrında yunan EOKA-cılar tərəfindən qətlə yetirilən 12 türk şəhidinin İskele şəhərində Xatirə abidəsinin açılışında olub. Zorlu Töre çıxışında bu torpaqları canlarından keçərək Vətən edən qəhrəmanların heç zaman unudulmayacağına əminliyini bildirib. Şahin Əliyev bu tədbirdə Şimali Kipr Türk Cümhuriyyətinin prezidenti Ersin Tatar`la görüşüb.
Cümhuriyyət Məclisinin sədri Zorlu Töre Türkiyə-Azərbaycan, Türkiyə-ŞKTC və Azərbaycan-ŞKTC parlamentlərarası dostluq qrupları və onları müşayiət edən nümayəndə heyətləri ilə birlikdə Maraş şəhərini gəzib. Şahin Əliyev və Serdar Şengül də bu gəzintiyə dəvət olunublar. Azərbaycan Milli Məclisinin ŞKTC Parlamentlərarası dostluq qrupunun sədri Cavanşir Feyziyev, Türkiyə-ŞKTC Parlamentlərarası dostluq qrupunun sədri Orhan Erdem mərasimdə çıxış ediblər. Maraşı gəzinti zamanı Şahin Əliyev AK Parti ŞKTC nümayəndəsi Fahri Yönlüer ilə görüşüb və onlar gənclərin inkişafı üçün prioritet istiqamətlər mövzusunda fikir mübadiləsi aparıblar.
Şahin Əliyev və Serdar Şengül ŞKTC Turizm və Ekologiya Nazirliyinin Tanıtım və marketinq şöbəsinin rəhbəri Mine Emiroğlu ilə də görüşüblər. Görüş zamanı onlar turizm əlaqələri, birgə keçiriləcək layihələr haqqında danışıblar. Şahin Əliyev və Serdar Şengül Mine Emiroğlu‘ya Azərbaycan-Şimali Kipr dostluq əlaqələrinin inkişafındakı əməyinə görə “Xidmət Mükafatı” təqdim ediblər. Mine Emiroğlu da Şahin Əliyevə Şimali Kipr mədəniyyətini özündə əks etdirən əl işlərindən ibarət hədiyyə verib.
Sonra Şahin Əliyev və Serdar Şengül Torex Trading şirkətinin rəhbəri Tuygun Töre ilə görüşüblər.
Torex Trading ŞKTC təşkilatıdır və təkrar emal edilmiş tullantı torbaları istehsal edir, həmçinin təmizlik və gigiyena məhsulları satır. Bu mövzuda Şahin Əliyev Tuygun Töre ilə Azərbaycanda 2024-cü ilin “Yaşıl Dünya Naminə Həmrəylik İli” elan olunması və Bakıda keçiriləcək COP29 ilə bağlı fikir mübadiləsi aparıblar.
Şahin Əliyev ŞKTC Ülkü Ocaklarının rəhbəri Fatih Arıcı ilə görüşüb. Görüş zamanı hər iki tərəf öz fəaliyyət istiqamətlərindən, birlikdə icra ediləcək layihələrdən danışıblar.
Mayın 16-da isə Cümhuriyyət Məclisinin sədri Zorlu Töre Azərbaycan Milli Məclisinin Azərbaycan - ŞKTC Parlamentlərarası əlaqələr üzrə işçi qrupunun rəhbəri Cavanşir Feyziyevi və onu müşayiət edən nümayəndə heyətini Ercan hava limanından yola salıb. Mərasimdə Şahin Əliyev, Serdar Şengül iştirak ediblər.
Mayın 16 -da Zorlu Töre yenidən Şahin Əliyev, Serdar Şengül və Türkiyə nümayəndəliyi ilə görüşüb, onlara uğurlar arzulayıb və Türk dünyası gənclərini birliyə səsləyib.
Mayın 17-də “Əbədi Birlik” Gənclər İctimai Birliyinin səfəri başa çatıb.