2024-cü il iyunun 27-də Xəzər Universitetində Hüquq departamentinin təşkilatçılığı ilə “Korrupsiya xöşbəxtlik gətirə bilərmi – biz niyə korrupsiyaya qarşı mübarizə aparmalıyıq?” mövzusunda seminar keçirildi.
Universitet əməkdaşlarının iştirakı ilə keçən seminarda əsas məruzəçi – Azərbaycan Respublikası Milli Məclisinin sabiq üzvü, Konstitusiya Araşdırmalar Fondunun prezidenti Əliməmməd Nuriyev çıxış etdi. Natiq Azərbaycan dövləti tərəfindən ölkədə korrupsiyaya qarşı geniş mübarizə aparıldığını söyləyərək qeyd etdi ki, hələ 2004-cü ildə yaradılmış Azərbaycan Respublikasının Korrupsiyaya qarşı mübarizə üzrə Komissiyası korrupsiyanın qarşısının alınması sahəsində ixtisaslaşmış orqan funksiyalarını həyata keçirir, öz fəaliyyətini qanunvericilik, icra və məhkəmə hakimiyyətləri ilə qarşılıqlı əlaqədə qurur və korrupsiyaya qarşı mübarizənin vəziyyəti barədə Azərbaycan Respublikasının Prezidentini, Azərbaycan Respublikası Milli Məclisini və Azərbaycan Respublikası Konstitusiya Məhkəməsini mütəmadi olaraq məlumatlandırır. Eyni zamanda, hazırda Azərbaycan Respublikasının Prezidentinin Sərəncamı ilə təsdiq edilmiş “Korrupsiyaya qarşı mübarizənin gücləndirilməsinə dair 2022-2026-cı illər üçün Milli Fəaliyyət Planı”na uyğun olaraq müəyyən tədbirlər görülməkdədir. Məruzəçi, bunlarla yanaşı, ictimai nəzarətin və ictimai müdaxilənin zəruri olduğunu və vətəndaşlarla müvafiq maarifləndirmə işinin aparılmasının vacibliyini nəzərə çatdırdı.
Məruzədən sonra ətraflı fikir mübadiləsi, müzakirələr aparıldı.
Sonda Hüquq departamentinin müdiru Cabir Xəlilov məruzəçiyə və iştirakçılara təşəkkürünü bildirərək, gələcəkdə belə tədbirlərin daha geniş formatda keçirilməsinə ehtiyac olduğunu vurğuladı.