2024-cü il iyunun 20-də Bakı Biznes Universitetinin koordinator və Xəzər Universitetinin tərəfdaş olduğu “Azərbaycan Rektorlar Konfransının Yaradılması” layihəsinin yekun hesabat konfransı keçirilib. Konfrans Bakı Biznes Universitetinin rektoru  Prof. İbad Abbasovun giriş nitqi ilə açıq elan edilib.  Rektor  təqribən bir milyon avro dəyərində  qiymətləndirilən  bu layihənin 2020-2024-cü illəri əhatə etməklə Bakı Biznes Universitetinin koordinatorluğu ilə 4 il müddətində uğurla icra olunduğu  barədə ətraflı məlumat verib.

Daha sonra Elm və Təhsil nazirinin müşaviri Nicat Məmmədli, Elm və Təhsil üzrə Dövlət Agentliyinin direktoru  Ülkər Səttarova çıxış edərək layihə haqqında öz fikirlərini bildirib və  iştirakçılara  səmimi təbriklərini çatdırıblar.

Bakı Biznes Universitetinin Beynəlxalq əlaqələr üzrə prorektoru Eşqin Bayramov və Universitet-sənaye əməkdaşlığı departamentinin direktoru Gülşən Bayramova öz hesabat-təqdimatlarında ECAR layihəsinin  hazırlanması zərurəti, mövcud olan ehtiyaclar, layihənin əsas məqsədi və hədəfləri, icra mərhələləri, o cümlədən layihə çərçivəsində fəaliyyət göstərən pilot komitələr haqqında geniş məlumat veriblər.

Hesabat-təqdimatdan sonra layihənin yekun nəticəsi hesab edilən layihə konsorsiumunun üzvü olan 21 universitet tərəfindən imzalanmış tərəfdaşlıq sazişinin təqdim edilməsi mərasimi keçirilib.

Yekunda layihənin Avropadan olan tərəfdaşları da çıxış edərək  bu sahədə  qazanılan  uğurlardan bəhs  ediblər.

Qeyd edək ki, tədbirdə Xəzər Universitetinin rektoru Dos. İradə Xəlilova, layihənin komitə üzvləri, İnkişaf Mərkəzinin rəhbəri Raziyə İsayeva, Keyfiyyət Təminatı Mərkəzinin rəhbəri Lyudmila Sotova, Beynəlxalq Əlaqələr şöbəsinin müdiri  Fatimə Vəliyeva və layihənin meneceri Səbinə Quluyeva təmsil olunublar.