Xəzər Universitetinin İnkişaf Mərkəzinin direktoru Raziyə İsayeva 2024-cü il mayın 13-14-də universitetlərin üçüncü missiyası: sosial və iqtisadi inkişaf üçün tərəfdaşlığa həsr olunmuş SPHERE seminarında iştirak etmişdir. SPHERE Avropa Komissiyası tərəfindən maliyyələşdirilən Ali Təhsildə İslahatlar Ekspertləri (ATİE)  şəbəkəsinə mərkəzləşdirilmiş bir dəstəkdir. ATİE şəbəkəsi 2007-ci ildə Qərbi Balkanlar, Orta Asiya, Şərq tərəfdaşlığı və Cənubi Aralıq dənizi bölgəsi də daxil olmaqla AB ilə həmsərhəd olan üçüncü ölkələrdə ali təhsilin modernləşdirilməsini təşviq etmək üçün yaradılmışdır.

Bu dəfə seminar Özbəkistanın Səmərqənd şəhərindəki “İpək Yolu” Beynəlxalq Turizm və Mədəni İrs Universiteti tərəfindən keçirilib.   Seminar universitetlərin 3-cü missiyasına həsr olunmuş və bölgənin hər yerindən, eləcə də İtaliya və Belçika kimi Qərb ölkələrindən çoxsaylı nümunə araşdırmalarını əhatə etmişdir. Seminarda üçüncü missiyanın cəmiyyət və iqtisadiyyatla dərin əlaqəsini əhatə edən inklüziv konstruksiya olmasının səbəbləri və yolları geniş müzakirə olunub. Bu mövzu ətrafında qurulan plenar müzakirələrdə müxtəlif ölkələrdən və qurumlardan nümunələr nəzərdən keçirilib.

Azərbaycanı Erasmus+ ali təhsil islahatı üzrə ekspert kimi təmsil edən Raziya İsayeva seminarda fəal iştirak edərək, plenar müzakirədə universitetlərin üçüncü missiyasının  təşviqi strategiyaları haqqında öz mülahizə və fikirlərini bildirmişdir.

Seminar şəbəkənin maarifləndirilməsi və genişləndirilməsi ilə yanaşı, tarixi abidələri və qonaqpərvərliyi ilə hər bir iştirakçını heyran edən qədim Səmərqənd şəhərini ziyarət etmək və ondan həzz almaq imkanı verdi. “İpək Yolu” Beynəlxalq Turizm və Mədəni İrs Universiteti 2 gün ərzində əsl qonaqpərvərlik və alicənablıq nümayiş etdirdi. Ölkənin nüfuzlu universitetlərindən biri olan qurum iştirakçılara təqdim etdiyi tur boyu tələbələrinin diqqətəlayiq nailiyyətlərini, eləcə də infrastruktur və institusional inkişafdakı irəliləyişləri diqqətə çatdırdı.