1993-2003-cü illərdə Xəzər Universiteti Biokimya departamentinin müdiri olmuş, Amerika Birləşmiş Ştatları Puerto-Riko Universitetinin professoru Səbzəli Cavadov 2024-cü il iyunun 4-də ömrünün 64-cü ilində qəfil ürək tutmasından vəfat ermişdir.
Səbzəli Javadov 1960-cı il mayın 20-də Azərbaycan Respublikasının Xaçmaz rayonunda ziyalı ailəsində anadan olmuşdur. O, Bakı şəhərində orta təhsil, Piroqov adına 2-ci Moskva Tibb İnstitutunda biokimya ixtisası üzrə ali təhsil, SSRİ-nin Tibb Elmləri Akademiyası Ümumittifaq Kardiologiya Elmi Mərkəzinin Eksperimental Kardiologiya İnstitutunda biokimya - kardiologiya ixtisasları üzrə tibb elmləri namizədi alimlik dərəcəsi almışdır.
1992-ci ildə Rusiya Kardiologiya Elmi-İstehsalat Kompleksi və Rusiya Xalqlar Dostluğu Universitetinin müştərək elmi şurasında doktorluq dissertasiyası müdafiə etmişdir.
Əmək fəaliyyəti ərzində Azərbaycanda və Qərb ölkələrində çalışmış Səbzəli Cavadov Azərbaycan elmini layiqincə tanıtmış və təmsil etmişdir. 2003-2008-ci illərdə Kanadanın Qərbi Ontario Universitetinin (indiki adı: Western University) Tibb fakültəsinin dəvəti ilə Kanadaya köçmüş və elmi tədqiqatlarını bu universitetdə davam etdirmişdir. 2009-cu ildən həyatının son gününə qədər ABŞ-da Puerto-Riko Universitetinin Tibb Fakültəsinin professoru və Ürək Mitoxondrilərin Tədqiqi Elmi Laboratoriyasının direktoru olmuşdur.
Səbzəli Cavadov ürək biokimyası və fiziologiyası üzrə xüsusi təlim və təcrübəyə malik beynəlxalq səviyyədə tanınmış alimdir. O, ABŞ Stenford Universiteti tərəfindən hazirlanmiş reytinq cədvəlinə görə 2022 və 2023-cü illərdə dünyanın ən çox istinad edilən top 2% alimlərin siyahısına daxil edilib. 140-dan çox elmi məqalənin, kitab və kitab bölməsinin müəllifidir, 3 patentə sahibdir, 120-dən çox elmi konfransda çıxış etmişdir. Onun məqalələri yüksək impakt faktorlu jurnallarda dərc edilmişdir. Bir çox nüfuzlu elmi cəmiyyət və komitələrin üzvü idi.
Səbzəli Cavadov Xəzər Universiteti ilə əlaqə saxlayırdı. Sonuncu dəfə 2022-ci il oktyabrın 6-da universitetdə "Ferroptoz hüceyrə ölümünün yeni mexanizmi kimi: mitoxondrinin rolu" (Ferroptosis as a new mechanism of cell death: the role of mitochondria) mövzusunda elmi seminar keçirmişdi.
Tanınmış alim, qayğıkeş və səmimi insan, professor Səbzəli Cavadovun əziz xatirəsi onun tələbələri, dostları və onu tanıyanların qəlbində daim yaşayacaqdır.
Allah rəhmət eləsin!