2024-cü il iyun 4-də “For Azerbaijan” təşkilatı tərəfindən Xəzər Universitetinin kitabxanasına 25 ədəd “Posttravmatik stress pozuntusu hallarında Yazılı Ekspozisiya Terapiyası” adlı kitab hədiyyə edildi.
2021-ci ildə ABŞ-da yaradılmış və Azərbaycanda qeydiyyatdan keçmiş, “For Azerbaijan” təşkilatı dövlət qurumları və özəl sektor nümayəndələri ilə birgə müxtəlif sosial layihələr icra edən xeyriyyə təşkilatıdır.
Təşkilat təhsil və səhiyyə xidmətlərinə, həmçinin psixoloji dəstəyə ehtiyacı olan insanlara yardım edir. “For Azerbaijan” hər il bir neçə sosial layihə həyata keçirməklə yanaşı, eyni zamanda uzunmüddətli flaqman sayılan Azərbaycanda Psixoloji Reabilitasiya İmkanlarının Artırılması (APRİA) layihəsini də davam etdirir.
Layihənin əsas komponentlərindən birinin icrası olaraq ABŞ-da Post Travmatik Stress Pozuntusunun müalicəsində geniş istifadə olunan Koqnitiv İşlənmə Terapiyası (KİT) və Yazılı Ekspozisiya Terapiyası (YET) kimi 2 mühüm müalicə metodu üzrə Azərbaycanda yerli psixoloqlar hazırlanıb.
Layihə çərçivəsində amerikalı professorlar Denise M.Sloan və Brian P.Marx-ın müəllif olduqları “PTSP hallarında Yazılı Ekspozisiya Terapiyası” kitabı nəşr etdirilərək psixologiya sahəsində çalışan mütəxəsisslərə təqdim olunub. Kitab ABŞ-da Post Travmatik Stres Pozuntusu hallarında aparıcı müalicə üsuluna çevrilmiş Yazılı Ekspozisiya Terapiyası üzrə işləyən psixoloqlar üçün əsas təlimat vəsaiti kimi, universitetlərdə isə tədris vəsaiti qismində istifadə edilir. Layihə çərçivəsində daha bir kitab (PTSP hallarında Koqnitiv İşlənmə Terapiyası) isə yaxın zamanlarda nəşr etdiriləcək.
Aytac Misgərli