2024-cü ilin may ayında İqtisadiyyat və menecment departamenti tərəfindən silsilə seminarlar təşkil olunub. Seminarda “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” çərçivəsində Böyük Britaniyanın Exeter Universitetində və Türkiyə Respublikasının İstanbul Universitetində təhsil alan doktorantura tələbələri çıxış ediblər.

Mayın 6-da keçirilən seminarda Exeter Universitetinin doktorantura tələbəsi Əli Məmmədov “Yaşıl Texnologiya və Firma Performansı” mövzusunda öz araşdırmalarını tələbələrlə bölüşüb. O, öz çıxışında Eko innovasiyanın (Eİ) firmanın həm ekoloji, həm də maliyyə göstəricilərinə müsbət təsirini vurğulayıb və öz  tədqiqatında Eİ-yə keçidə kömək edən, yaxud  mane olan əsas amillər haqqında  məlumat verib.

Mayın 14-də baş tutan  seminarda İstanbul Universitetinin doktorantura tələbəsi olan Murad Əliyev “İş mühitində iş-həyat balansı” mövzusunu  tələbələrə və departamentin işçi heyətinə təqdim edib. O, müasir həyatda iş-həyat balansının vacib olduğunu söyləyib. Sonra Murad Əliyev işçilərin rifahını prioritetləşdirmək üçün müxtəlif şirkətlərin istifadə etdiyi fərqli texnikaları müzakirə edib.

Mayın 15-də isə İstanbul Universitetinin doktorantura tələbəsi olan Məhəmməd Çərkəzov ekonometrik kontekstdə “Zaman sıraları”nın icmalı ilə çıxış edərək, zaman sıralarının təhlilində əsas mövzular haqqında  tələbələri maarifləndirib. Sonra o, kointeqrasiya əlaqələrini müəyyən etmək üçün vacib olan müxtəlif statistik testlərdən istifadə qaydaları  haqqında məlumat paylaşıb.

İnteraktiv formada keçən hər üç seminarda məruzçəçilər, həmçinin  İqtisadiyyat və menecment departamentinin tələbələri arasında müzakirələr aparılıb.